Duha ka job order nga kawani nga positibo sa drug test hayan mataktak
CEBU, Philippines — Posibleng matangtang sa ilang trabaho ang duha ka job order nga kawani nga nadestino sa Lapu-Lapu City Hospital human kini magpositibo sa surprise drug test nga gipahigayon sa buhatan sa City of Lapu-Lapu for Substance Abuse Prevention (CLOSAP) niadtong Pebrero 2, 2024.
Gipadayag ni Lapu-Lapu City mayor Junard Ahong Chan nga kun mag positibo pa gihapon sa confirmatory test ang maong mga kawani awtomatik nga matangtang kini sa ilang trabaho.
Subay niini nanawagan si Chan ngadto sa mga opisyales sa barangay nga hugtan pa nila ang pagbantay sa mga nalambigit sa illegal nga drugas sa ilang tagsa tagsa ka lugar.
Namatikdan usab nga daghan sa mga kawani sa gobyerno ang nalambigit sa illegal nga drugas hinungdan nga gihimo ang mga kinalit nga drug testing.
Hinuon si mayor Chan miingon nga ipaubos pa ang maong mga kawani sa voluntary rehabilitation ug kun mahuman ang rehab mahimo pa kini nga mo apply og balik sa City Hall.
Nagtuo ang mayor nga sayon na lamang gayod karong mga panahona ang pagpalit og ilegal nga drugas hinungdan nga siya nag-awhag sa mga opisyal sa matag barangay nga bantayan ug ilhon ang mga namaligya niini sa ilang lugar ug itahu gilayon ngadto sa kapolisan. (BANAT NEWS)
- Latest
