Tulo ka empleyado sa Lapu-Lapu positibo sa drug test
CEBU, Philippines — Tulo ka empleyado sa Dakbayan sa Lapu-Lapu ang nagpositibo atol sa gipahigayong random drug test nga gipahigayon sa City of Lapu-Lapu Office for Substance Abuse Prevention (CLOSAP) nga gipangulohan ni Garry Lao niadtong adlaw’ng Lunes. Niabot ngadto sa 115 ka job order nga trabahante gikan sa city hall ug traffic enforcer sa City Traffic Management System (CTMS) ang gipaubos sa random drug test. Matud ni Lao nga tulo ka personnel sa CTMS ang giingong nagpositibo sa paggamit og shabu.
Ang pagpahigayon og drug test sa CLOSAP niadtong adlaw’ng Lunes maoy ikatulo nila karong tuiga human nagpahigayon na sila og drug test niadtong Enero 12, 2024 sa 69 ka trabahante sa Barangay Basak ug usa niini ang positibo sa paggamit og ilegal nga drugas ug niadtong Enero 15, 2024 adunay 86 ka personnel sa Barangay Pusok diin pito kanila ang nagpositibo.
Ang random drug test gihimo isip compliance sa Executive Order No. 35 nga giluwatan niadtong 2019 ni Mayor Junard “Ahong” Chan nga istriktong nagpatuman sa pag- implementar sa drug-free workplace.
Paaboton pa ang confirmatory results batok sa mga nagpositibo sa paggamit sa ginadiling drugas.
Nasayran niadtong tuig 2022 adunay unom ka personnel sa CTMS ang nagpositibo sa CTMS sa paggamit og ginadili nga drugas. Romeo T. Limpangog, BDB BANAT NEWS
- Latest
