Barangay workers, officials gipaubos sa drug tests

CEBU, Philippines — Dili mominos sa 85 ka kawani ug barangay officials sa Barangay Pusok sa Lapu-Lapu City ang gipaubos sa kinalit nga drug test kagahapon sa buntag adlaw nga Lunes.

Ang drug test gihimo pinangulohan sa hepe sa City of Lapu-lapu Office for Substance Abuse Prevention Garry Lao.

Matud pa ni Lao, ang CLOSAP nga nibalik na sa ilang pagpahigayon og random and surprise drug testing sa mga barangay workers lakip sa mga barangay officials.

Ang maong lakang sumala pa ni Lao, subay kini sa kamanduan ni Mayor Junard “Ahong” Chan sa CLOSAP isip kabahin sa tinguha sa paghunong sa illegal nga pagamit sa ginadili nga drugas ug pagmentinar sa drug-free environment.

Gitug-an ni Lao, gawas sa drug test nga ilang gihimo kagahapon adlawa sa barangay Pusok, susamang drug test sab ang ilang gihimo niadtong adlaw nga Biyernes diin 69 ka mga trabahante sa Barangay Pajo ang gipaubos sa surprise drug test.

Dugang pa ni Lao, sa gipahigayon nga drug test nila niadtong buwan sa Disyembre dunay tulo ka kawani gikan sa LDRRMO ang napositibo samtang 115 ang negatibo.

Ang tumong ug tuyo sa maong kalihukan aron sa pagsiguo nga ang mga officials makahimo og tukma og sakto sa ilang mga trabaho ilabi na sa pag implementar may kalabutan batuk sa illegal nga drugas. (BANAT NEWS)