Construction works sa kadalan atol sa rush hours gisugyot nga idili

CEBU, Philippines — Si Konsehal Nestor Archival sa konsehos a Dakbayan sa Sugbo niduso og ordinansahon nga nagdili sa mga utility company sa paghimo og mga construction work diha sa mga nag-unang dalan ilabi na sa rush hour.

Ang maong ordinansahon nag-ulohan og “An ordinance Prohibiting Utility Companies to undertake construction works in main roads during rush hour within the jurisdiction of the City of Cebu, Providing Exception and Penalties thereto”.

Gitumbok ni Archival ang mga hinungdan sa paggama sa maong ordinansahon diin lakip niini ang deklarasyon sa Probinsiya sa Sugbo nga ubos sa traffic crisis niadtong Oktubre 15, 2019, nunot sa taas nga oras sa adlaw-adlaw nga pagbiyahe sa metropolitan area.

Gawas niini, gitumbok usab ni Archival nga ang Metro Cebu ekonomikanhon nga mawad-an og P1.1 bilyones kada adlaw tungod sa wala masulbad nga kahuot sa trapiko, kini base sa inisyal nga resulta nga gipagawas sa pagtuon nga gihimo sa Japan International Cooperation Agency (JICA) sa tuig 2018.

Ang citation sa iyang sugyot nagpakita nga ang trapiko sa Metro Cebu mograbe atol sa rush hours nga gikonsiderar nga magsugod sa alas 6:00 sa buntag hangtud sa alas 10:00 sa buntag ug dayon sa alas 4:00 sa hapon ngadto sa alas 8:00 gabii kada adlaw sa semana.

“Aside from the mentioned factors, construction works undertaken by government agencies as well as public utility companies further contribute to the worsening traffic condition of the City of Cebu especially during rush hours”, tipik sa ordinansahon ni Archival.

Matud ni Archival nga ang mga construction work nga gihimo sa mga utility company, sama sa pagkawot nakamugna og kahuot sa trapiko tungod kay gikinahanglan ang pagsira sa mga karsada, mga lane, ug uban pang mga dalan diin mapugos ang mga motorista nga maghuwat sa linya sa trapiko nga hinay-hinay nga moagi diha sa mga gitrabaho nga karsada.

Si Archival nagkanayon nga ang tinubdan sa kahuot sa trapiko mahimong mamenosan pinaagi sa pagpatuman sa mga “sensible policy” aron mapalambo ang kaepektibo sa mga pagtrabaho sa kadalanan nga dili makompromiso ang pagbiyahe sa katawahan.

Subay niini, gisugyot ni Archival ang mosunod nga mga polisiya aron mahapsay ang dagan sa trapiko.

Lakip niini ang pagdili sa mga construction work nga gihimo sa mga public utility company nga makabalda sa trapiko ug makamugna og kahuot ilabi na sa rush hours.

Ang nahisgutang ordinansahon gi-refer kini ngadto sa Committee on Law, Ordinances and Styling, Committee on Environment, Natural Resources and other utilities, ug Committee on Infrastructure atol sa regular session sa konseho sa siyuda niadtong Miyerkules. — /BDB (BANAT NEWS)