Magtutuo nagsugwak sa ikalima ka adlaw sa Misa de Gallo
CEBU, Philippines — Archbishop Jose Palma uban sa mga kaparian sa Archdiocese of Cebu maoy nangulo sa ikalima ka adlaw sa Misa de Gallo diha sa Our Lady of the Immaculate Conception Parish, Barangay Matab-ang, Dakbayan sa Toledo.
Uban ni Palma ang kura paruko nga si Padre Jose De Dios III ug Padre Felmar Castrodes Fiel, SVD, general Manager sa DyRF1215/Power Fm 89.1.
Bagang duot sa mga magtutuo ang nitambong sa Santos nga Misa sa maong parokya diin nagsugwak ang simbahan.
Si Palma nipadayag atol sa iyang wali nga aron si Hesus mahimong tawo kinahanglan siya og inahan ug tungod niini mapasalamaton siya sa Mahal nga Birhen sa pagsugot diin kini ang unang nidawat ni Hesus diha sa iyang kasing-kasing ug dayon sa iyang sabakan.
Matud ni Palma nga sama kang Maria angayan usab nga adunay balay si Hesus sa tagsa-tagsa ka kasing-kasing sa mga tawo ug iyang panghinaot nga dili lang magpabilin sa pasungan si Hesus ug angayan usab kining abi-abihon ug pasudlon sa tagsa-tagsa ka mga kasing-kasing.
Sulod sa Santos nga Misa adunay mga kalihokan usab nga gihimo ang kadagkoan sa simbahan ilabi na kalabot sa nagpadayon nila nga proyekto.
Si Palma molibot pa sa pipila ka mga parokya sa Sugbo alang sa nagpadayon nga misa de gallo. (BANAT NEWS)
- Latest
