Kanhi editor sa The Freeman, abogado na
CEBU, Philippines — Kanhi editor sa The Freeman, igsuong pamantalaan sa Banat News, John Mayugba Destacamento, nakapasar sa bag-ohay lang natapos nga Bar exams nga gihimo niadtong bulang sa Septiyembre ning tuiga.
Si Destacamento anak og mananagat gikan sa lungsod sa Medellin sa amihanang Sugbu naapil sa 3,812 ka mga nakapasar sa 2023 Bar Examination aron maapil sa pipila ka mga Sugbuanong tigbalita nga karon nahimo ng mga abogado.
"Nothing but gratitude in my heart. "Thank you to my God, and my family, relatives, in-laws, friends, colleagues, professors, and just random individuals who said a prayer and supported me in this journey. I share this feat with all of you. Salamat, salamat, salamat." Post pa ni Destacamento sa iyang Facebook page.
Si Destacamento gradwado sa USC School of Law and Governance. Ikaupat siya nga kanhi sakop sa The Freeman, usa sa labing karaang community-based newspaper sa Pilipinas, nga nakapasar sa bar exams sa nakalabay nga duha ka tuig, human nilang Atty. Michael Vencynth Braga, Atty. Grace Melanie Lacamiento, ug Atty. John Rey Saavedra.
Una siyang nagsugod sa media isip opinion columnist sa The Freeman niadtong 2012 hangtud nga nakita iyang potensyal aron mahimong business reporter, assistant business editor, metro editor, assignments editor ug assistant news editor.
Nagbunga og maayo ang sakripisyo ni Destacamento aron makab-ot ang gitinguhang mamahimong abogado.— Freeman, IBM (BANATNEWS)
- Latest
