Gisugyot nga revised RPT naa na sa ikatulong public hearing

CEBU, Philippines — Gipasabot sa kagamhanan sa dakbayan sa Sugbo ang gihimong rebisyon kun pag-usab sa Real Property Tax (RPT) nga anaa na sa ikatulong public hearing.

Kagahapon (Huwebes) sa hapon, ang Committee on Budget and Finance nag-imbitar sa nagkalain-laing stakeholders, developers, homeowners’ associations, independent appraisers, ug real estate brokers alang sa usa ka public forum.

Kini aron mapasabot niini nga ang gi-revised nga Real Property Tax dili kini direktang nagpataas sa buhis kon dili ‘pag-update’ lang niini.

Si Committee on Budget and Finance Chairman sa Cebu City Council, Konsehal Noel Wenceslao niingon nga importante ang forum aron mapasabot pag-ayo ang grounds sa gisugyot nga ordinansa.

Ang RPT wala pa na revised sukad niadtong 2003 ug wala mapatuman hangtud sa 2006.

Matud ni Wenceslao, sanglit ang ubang mga silingang siyudad naka revised na sa ilang RPT, ang dakbayan sa Sugbo nagpabilin nga nagpatuman sa tax rate nga na implementar niadtong 2003.

Dugang niya, nga ang DILG pinaagi sa Bureau of Local Government Finance mipahinumdum nga ang Fair Market Value (FMV) diin gibasehan sa pagsaka sa RPT rates, kinahanglang usbon ug i-update.

Adunay tulo ka mga component ang RPT nga naglakip og building, makinarya, ug lote. Gipasabot ni Wenceslao nga alang sa mga lote, kinahanglan nilang ipatuman ang kasamtangan nga                    FMV.

Dugang pa niya nga ang lote ug ang bili niini kanunay nga na ‘appreciate’, Nagpasabot nga kanunay nga motaas ang rate niini sa paglabay sa panahon, ilabi na sa dakbayan sa Sugbo, nga gikonsiderar nga usa ka dynamic city.

 “Kung natukod na 2003 ang yuta…naa siyay depreciation charges, so iyang value for improvement niya mo ubos…also with machinery, kung napalit nimo 2003 ang machinery, nya until now it is still operating, so 2003 mao pa nay value, pero unya i-depreciate kay naa may wear and tear so miubos iyang value,” matud ni Wenceslao.

Ang pagkunhod sa tax rates sa mga makinarya ug mga edipisyo, mahimo usab nga mokunhod ang epekto niini sa rate sa buhis.

Tungod niini, si Wenceslao midugang nga ang gi revise nga RPT ordinance wala lamang magpasabot nga nagkataas ang buhis kondili ang pag-update sa kinatibuk-ang buhis ug siya nanghinaot masabtan pag-ayo sa mga property owners. — MEL (BANATNEWS)