Sambag 2  ilalum sa calamity state

CEBU, Philippines — Ang Barangay Sambag 2 nideklarar og state of calamity kagahapon human sa pagkahagsa sa riprap diha sa Sitio Kawayan ug adunay balay nga naapektohan diin natagak ang bangirahan niini ug padayon usab ang pag-irog sa yuta.

Si Kapitan Ryan Aznar nagkanayon nga nibigay ang stone masonry sa side sa Guadalupe River habig sa iyang barangay human sa nahitabo nga landslide sa Barangay Calamba hinungdan sa pagka hagsa sa riprap ug adunay usa ka balay nga apektado.

Apan ang nanag-iya sa unom ka estraktura o pito ka balay nga gilangkuban sa 38 ka indibidwal ang ilang gipabakwit diha sa gym sa barangay isip temporary shelter gumikan kay padayon nga naglihok ang yuta diha sa lugar.

Ang maong mga tawo anaa nagpuyo sa 3-meter easement ug magpaabot pa siya sa kagamhanan sa siyudad alang sa aksiyon nga buhaton alang sa mga nahisgutang residente.

Matud ni Aznar nga ang Department of Social Welfare and Services niapod-apod og pagkaon sa mga apektado nga residente diin hangtud kini sa adlaw’ng Biyernes.

Gibutyag ni Aznar nga gitan-aw nila karon ang ilang pundo kong pila ang magamit ug magdepende usab sa Engineering Department kay lisod usab nga ilang pasagdan ang maong dapit nga risgo usab sa mga residente.

Ang ilang calamity fund gamiton nila pag-mitigate sa problema sa dapit tungod kay aduna naman usab kini pundo nga poyekto gikan sa panudlanan ni Kongresista Cutie Del Mar apan naunhan lang gayud sila sa maong panghitabo.

Si Aznar nagkanayon nga makig-alayon usab sila sa Commission on Election kong magamit ba nila ang ilang pundo ilabi na eleksiyon period karon apan nagkinahanglan usab ug dinaliang tubag ang problema sa maong dapit ilabi na nga kanunay’ng usab-usab ang lakat sa panahon.

Samtang sa Dakbayan sa Talisay, walay mga pagdahili sa yuta ang nasinati karon sa siyudad niining pagsige og bunok sa uwan. Kini ang gibutyag ni Alvin Santillana, pangulo sa City Disaster Risk Reduction and Management Office (CDRRMO).  (BANAT NEWS)