Pipila ka lugar nidahili, force evacuation gimando

CEBU, Philippines —  Pipila ka mga lugar dinhi sa Sugbu ang kalit nga nahugmak tungod sa sagunson nga pagsige og bunok sa uwan sa nanglabay nga mga adlaw.

Gani ang riprap sa  usa ka pribadong bodega diha kilid sa sapa Upper San Roque, Barangay Calamba ning Dakbayan sa Sugbo ang nahugno tungod sa nasinating uwan kagahapon sa kaadlawon adlaw nga Martes.

Usa sa mga residente nga si Elizabeth Larobis, alas-3 sa kaadlawon kapin dihang nakadungog siya og kanaas  ug sa iyang paglili kalit nga dunay nahagsa, ang riprap na diay kini.

Dali siyang namukaw sa mga silingan hinungdan sa pagbangon sa mga tawo sa palibot. Ang chairman sa Flood Control ug Infra sa konseho nga si Konsehal Jerry Guardo nimando og force evacuation sa mga molupyo kay peligrong mausab pa kini tungod sa pagsige og pag-ulan.

Gani atol sa pagsusi ni Guardo nagpadayon ang pagsige og kahagsa sa yuta padung sa sapa.

Gisusi na karon kun ang riprap iya bas a siyudad o sa gobiyerno aron mapangandaman og pundo para sa pag-repair niini.

Gawas sa Barangay Calamba, gisusi usab ni Guardo ug mga sakop sa OBO ug DEPW ang karsada sa Lower Busay tungod kay nakankanan ang yuta nga gikahimutangan niini ug dunay balay nga peligrong maapektahan.

Girekomendar niya nga ipaubos sa state of calamity ang maong dapit aron mapahigayon na ang clearing operation sa maong dapit ug magpadayon na gilayon ang pag-ayo sa maong dapit.

Sa Dakbayan sa Naga, midahili nasab ang yuta sa Purok Riverside, Barangay Cantao-an matud pa sa usa sa mga residente nga si Paul Candul sa interbyu kaniya sa GMA Super Radyo DYSS.

Ang pamilya ni Candul una nang nihiklin sa evacuation center human sila gipasidan-an nga delikado nga mohagsa ang ilang lugar tungod sa pagpangliki sa yuta sa palibot.         

Dunay 52 ka pamilya nga gimandoan paghiklin sa mas luwas nga dapit, apan 13 kanila ang nagmagahi. Si Candul miingon nga nagtalikid na karon ang ilang balay sa dihang iyang giduaw.

Ang mga pamilyang mibakwit nakadawat  niadtong Oktobre 10 og tag P30 mil gikan sa kontraktor ug sa DPWH isip partial nga ayuda tungod kay naapektahan sila sa proyekto niini.

Siya niingon nga karon ra nahitabo ang pagpangliki sa yuta sa ilang lugar human gisugdan ang proyektong karsada. (BANAT NEWS)