Lalaking gigapos, gisud og sako ug gipaligid sa pangpan tinuyoan ra

CEBU, Philippines — Binuang ra kadtong napalgang lalaki nga gisud og sako diha sa pangpang sa South Hills, Barangay Tisa, Siyudad sa Sugbo niadtong Sabado sa gabii sumala pa sa kapolisan sa Labangon Police Station 10.

Nasuta nga dako kining buhi ug mugna mugna lang sa 23- anyos nga lalake nga dunay ‘special needs’ ang nahitabo kaniya. Giputos niini og sako ang iyang ulo ug iyang gigapos ang iyang mga tiil ug nagpaligid-ligid kini sa pangpang.

Tungod dili tanan suhito sa kinaiya sa maong lalaki, normal lang nga gyud mopahibalo ang mga nakakita ngadto sa kapolisan sa pagtuong biktima kini sa salvaging o summary execution.

Apan sa pagsusi sa mga polis sa lalaking gisud sa maong sako, dako kining buhi gawas lang sa naangkong mga garas-garas nga nakuha gikan sa pagligidligid niini paubos.

Ang maong lalake, pangan gipugngan sa Banat News molopyo sa Sitio Filtro, Barangay Tisa ug matod pa dunay special needs.

Si Police Major Angelito Valleser, hepe sa Labangon Police Station 10 nga nahinabi sa mga tigbalita miingon nga adunay nakakita sa maong lalake nga nagdala og sako ug giputos niya niini ang iyang ulo ug pagkahuman magpaligid-ligid ug maglayat-layat sa bakilid.

Nahibaw-an sab sa kapulisan niadtong katapusang semana sa buwan sa Agosto nisuway sab kini og hikog pinaagi sa pagsaka sa punoan sa Sambag duol ra sa maong lugar, apan nasalbar ra.

"Wala'y foul play kay wala pud siya'y injuries nga matan-aw namo nga gibinuangan siya. Naa siya'y garas sa katong iyang tiil paminaw nako sa kato ng sige og ligid-ligid niya," sigon ni Valleser.

Ang inahan sa maong lalaki miangkon sa kapolisan nga mahilig mosundog ang anak sa kung unsa iyang makita ilabi na sa social media.

Dihang nibuto ang nahitabo kang Reah Mae Tocmo , gikatahong nagsige og tan-aw ang iyang anak sa mga balita bahin niini diha sa iyang cellphone hantod nga gisunod niini ang nahitabo.

"Estorya niya naa man manghunghong.  Mura bag friend niya nga maghunghong kunohay og unsay buhaton...Mura og gi portray niya iyahang kaugalingon nga siya pud kunohay si Reah nga gisud siya unya ang sako dili man dako, gagmay raman, kanag sakoha mao ra pud ng sakoha nakit-an sa witness nga gitakob sa iyang ulo," sigon ni Valleser.

Gitambagan sa kapulisan ang inahan nga dili na paggamiton og cellphone ang anak aron dili makakita og mga bati nga panghitabo nga iyahang sundon. — /IBM (BANAT NEWS)