Comelec mipagawas og lista kun unsay matawag nga vote buying
CEBU, Philippines — Ang Commission on Elections (Comelec) mipagawas og bug-at nga pahimangno para sa mga kandidato sa umaabot nga Barangay ug Sangguniang Kabataan Elections sa Oktobre 30 ning tuiga, gukdon ug patubagon sa balaod kadtong masakpang namalit og botos.
Gibutyag kini ni Comelec Commissioner Ernesto Maceda Jr. atol sa paglusad sa Committee on Kontra Bigay (CKB) niadtong adlaw nga Biyernes.
Atol sa maong kalihokan, gituki nila kun unsa nga mga buhat sa mga kandidato ug mga botante nga matawag nga vote buying ug namaligya og boto.
Kini naglakip sa paghupot ug pagdala og kwart, cards, notes, envelop, bags, bisan groceries, tokens ug bisan unsang dunay kantidad, basta dunay pasupot nga sample ballots o ba kaha mga campaign materials pabor o dili pabor sa usa ka kandidato o mga kandidato.
Isipon sab nga vote buying ang kalihokan kun makita ang mga botante nga naglinya para sa ayuda, paghatag og diskwento, burial assistance, libreng sakay, medical checkups, pagpanghatag og insurance o health cards, grocery items ug uban pang kalihokan nga ang tumong mao ang pag-agni sa botante aron mobotar kanila o dili pabotaran ang kaatbang atol sa panahon sa kampanya.
Apil sab sa gidili ang “hakot” system o ang pagtapok-tapok sa duha o daghang mga botante sa bisperas sa eleksyon.
Mopatuman sab ang Comelec og money ban, gidili ang paghupot o pagdala og kwarta nga lapas sa P500,000 nga adunay dalang mga campaign paraphernalia o mga ebidensiya nga madudahang gamiton kini sa pagpamalit og botos duh aka adlaw sa dili pa ang piniliay.
Ang CKB miestablisar na karon og KontraBigay Complaint Center aron didto ipadangat ang mga report bahin sa pagpamalit ug pagpamaligya og boto gikan mga reklamante nga nakasaksi niini.
Gipahibalo sab nga tugotan sa CKB ang warrantless arrest kun maaktohan silang nagbuhat sa maong mga gidili panahon sa election period.
“When it comes to vote buying and vote selling, it won’t be business as usual. There will be no sleeping during our watch,” ni Maceda pa.— /IBM (BANAT NEWS)
- Latest
