Truck natagak sa bung-aw, drayber nataban patay

CEBU, Philippines — Patay ang usa drayber sa 10-wheelers truck human kini natagak kagahapon sa kadlawon diha sa bung-aw sa Sitio Luwak, Barangay Napo, Dakbayan sa Carcar.

Ang biktima giila nga si Armando Ablan Matiga, hingkod ang panuigon, residente sa Sitio Tonggo, Barangay Taloot, Lungsod sa Argao nagmaneho sa Fuso 10-wheelers truck nga adunay plakang JAH-6139.

Si Police Lieutenant Colonel Pedy Noval,  hepe sa Carcar City Police Station nagkanayon nga ang maong  truck nga gimaneho ni Matiga puno kini sa kargang mga balas  nagbiyahe gikan sa Lungsod Minglanilla  paingon unta diha sa Lunsod sa Sibonga.

Apan pag-abot diha sa lugar nga nahitaboan ang mga ligid sa truck sa walang bahin ang naligas sa kilid sa karsada hinungdan nga nilahos kini ngadto sa bung-aw nga gibana-banang adunay giladmon nga 50 metros.

Nasayran nga ang maong karsada sa lugar gipaubos pa kini sa construction.

Matud ni Noval nga uban sa biktima niadtong higayona ang iyang anak ug pahinante kinsa nakalayat gikan sa truck dihang paingon na kining mahagbong.

Giingong si Matiga dakuon og lawas hinungdan nga wala kini makagawas sa sakyanan ug napiit kini sa manobela pagkatugpa sa ubos sa bung-aw.

Nasayran usab nga ang insidente nahitabo mga ala 1:00 sa kadlawon kagahapon apan na-report kini ngadto sa mga polis pagka-alas 5:00 na sa kadlawon tungod kay layo ang nahimutangan sa lugar paingon ngadto sa lungsod. —/BDB (BANAT NEWS)