Tabo sa Plaza Sugbu tulo gihapon ka adlaw

CEBU, Philippines — Ang Konseho sa Dakbayan sa Sugbu nag-lobby og dugang mga adlaw sa Tabo sa Plaza Sugbo Program nunot sa mga reklamo sa mga Farmers ug Traders nga alkanse sila human ang ilang scheduled nga mga adlaw gipamub-an na lang sa duha ka adlaw.

Niadtong Miyerkules, si Konsehal Pastor "Jun" Alcover mihatag og privilege speech nga namulong sa iyang kapasidad isip Chairman sa Committee on Agriculture and Rural Development nunot sa mga reklamo sa mga mag-uuma nga gipadangat sa iyang buhatan kalabot sa Tabo sa Plasa Sugbo Program.

Ang ilang gikabalak-an, sumala pa niya, mao ang pagbag-o sa Tabo sa Plaza nga gihimo nalang ngadto sa duha lang ka adlaw, Huwebes ug Biyernes, gikan sa tulo ka adlaw nga gilangkuban sa Miyerkules ngadto sa Biyernes.

“Apan karon kay murag subo kaayo paminawon kay sige sila’g anha sa Tabo, pero giputol man mao nga matod pa nila, alkanse sila kay mamaligya sila sa Thursday sa hapon, unya ini’g Friday sa hapon, molarga nasad sila,” matud ni Alcover.

Si Alcover miingon nga ang tulo ka adlaw nga schedule gikuhaan tungod sa mga reklamo  nga ang gibaligya sa Plaza Sugbo Grounds mas mahal kun itandi sa Carbon Public Market.

"Kung ang hinungdan mao ang ubang manindahay diha kay taas ang presyo ug nakalapas sa lagda ning maong programaha, nganong amungon man ang uban nga nagtinarong?" matud ni Alcover.

Dugang niya, trabaho ug responsibilidad sa City Agriculture Department ang pag-monitor sa mga presyo nga gipatuman sa mga mag-uuma.

Dugang pa niya, ang mga namaligya sa mas taas nga presyo kinahanglan nga badlungon imbes nga putlon ang gitugotan nga mga adlaw sa pagbaligya.

Matud ni Alcover nga angay untang solusyon ang pagpalig-on sa koordinasyon sa Cebu City Government ug sa mga Farmers and Traders.

Matud niya, ang Tabo sa Plaza sa Sugbo nga programa naghatag og gibug-aton sa kalambigitan sa City Government ug sa mga mag-uuma sa paghatag og mga paagi sa pagpamaligya sa mga lokal nga produkto.

Atol sa diskusyon, si Konsehal Jocelyn Pesquera, Council’s Majority Floor Leader, miingon nga nakadawat usab siya og susamang reklamo nga ang mga lokal nga produkto sa Tabo, mas mahal ang baligya itandi sa Carbon Public Market nga unta libre ra ang ilang pagpamaligya diha sa Plaza.

Si Konsehal Philip Zafra sa laing bahin miingon usab nga kinahanglang mag-monitor usab ang City Agriculture Department (CAD) aron masiguro nga mga mag-uuma gyud ang namaligya sa Tabo.

Tungod niini, si Alcover miingon nga usa kini ka hagit sa CAD sa hingpit nga pagmonitor sa programa. Giaprobahan dayon sa konseho ang mosyon sa paghangyo sa Office of the Acting Mayor ug sa CAD nga lugwayan ang Tabo sa Plaza Sugbo Program ngadto sa tulo ka adlaw inay duha ka adlaw. — /IBM (BANAT NEWS)