Minero natagaka’g bato, patay
CEBU, Philippines — Usa ka minero ang patay samtang usa sab angol sa nahitabong disgrasya sulod sa usa ka small scale coalmine sa may Purok Santol, Barangay Uling, dakbayan sa Naga kagahapon sa alas 6 sa buntag.
Ang nakalas mao si Robert Abalorio, 27, dunay kaipon ug nagpuyo sa Purok Acasia, Barangay Uling samtang ang naangol mao si Fernando Juntilla, trabahante gihapon sa coalmine, 50, ug taga Purok Acasia, Barangay Uling.
Luwas hinuon ang kahimtang sa kauban nilang si Joven Soronio Requinto, coalmine worker, 30, ug taga Purok 1, Tagjaguimit, Siyudad sa Naga.
Una niini, ang City of Naga Police Station nakadawat og tawag gikan sa City Disaster Risk Reduction and Management Office (CDRRMO) labot sa nahitabong aksidente ug dali nila kining girespondehan.
Sigon ni Police Lieutenant Colonel Verniño Noserale, hepe sa City of Naga Police Station kinsa niadto gyud sa nahitaboan miingon nga ang mga minero kinahanglang mosud sa mine shaft, lungag kini nga may gilawmong 100 meters ug ang gilapdon usa ra ka dupa.
Aron makanaog sa ubos mogamit sila og improvised elevator nga ginama sa baril aron didto mosakay ang mga minero paubos ug pabalik sa taas.
Didto sa ilawom mogamit sila og jackhammer aron pagkubkob sa coal nga ilang dad-on pataas.
Nahuman na matod pa ang tulo ka trabahante sa pagkuha og coal ug nag-ulhols ulhos lang sila sa pagsaka sa taas.
Unang nakasaka si Requinto samtang nabilin sila si Abalorio ug Juntilla. Apan didto sa ubos, gikatahong dunay nangatagak nga mga bato gikan sa ilang gipangbangagan ug naigo ang duha. Parehong nagsuot og hard hat ang duha apan bisan pa niini, wala niini maprotektahi ang ulo ni Abalorio tungod sa kadako sa bato nga nakaigo niini hinungdan sa pagkalupyak sa helmet og iyang ulo, sumala pa sa mga nakakita.
Hinoon si Noserale mitataw nga kun mosugot ang pamilya sa biktima ilaha kining ipa autopsy. Andam sab ihatag sa kapulisan ang ubang pang gikinahanglan nga tabang sa pamilya.
Legal ang maong coalmine sanglit nakakuha og kopya si Noserale og permits gikan sa Local Government Unit sa City of Naga ug DENR.
"Legal ra sila, single proprietorship nga company," sigon pa ni Noserale. IBM BANAT NEWS
- Latest
