CT-TODA naalarma sa pagsaka sa nangamatay gumikan sa aksidente
CEBU, Philippines — Naalarma na ang City of Talisay-Traffic Operation and Development Authority (CT-TODA) sa nagsaka nga gidaghanon sa mga tawo nga namatay gumikan sa disgrasya diha sa kadalanan.
Si Jonathan Tumulak, pangulo sa CT-TODA niangkon niini atol sa ilang tigom sa City Advisory Council.
Matud ni Tumulak nga niadtong niaging tuig nakatala lang sila og siyam ka tawo nga namatay atol sa disgrasya.
Apan sa ihap karon gikan sa buwan sa Enero hangtud sa Agosto anaa na sila’y nalista nga walo ka tawo nga namatay diin layo pa nga matapos ang tuig.
Nihangyo si Tumulak nga unta mabutangan og presensiya sa polis ang kadalanan tungod kay naobserbahan nila nga atol sa kagabhion kasagaran mahitabo ang disgrasya.
Niadtong niaging kadlawon, usa ka multicab van ang nibangga diha sa traffic light.
Ug maayo nalang gani kay luwas ra ang drayber ug niangkon kini nga nakatagpilaw samtang nagmaneho hinungdna nga nabangga. Dugang ni Tumulak nga padayon ang ilang pagpatuman sa istrikto nga lagda sa karsada tungod kay mao kini ang usa sa mga makapadisiplina sa motorista. —/BDB (BANAT NEWS)
- Latest
