Basura nga nibara sa kanal hinungdan sa baha

CEBU, Philippines —  Nagbara nga mga basura maoy nakita nga hinungdan sa pagbaha sa pipila ka mga lugar sa Dakbayan sa Talisay panahon nga mobunok ang uwan.

Si Gary Togonon, pangulo sa Aksyon Agad Team nagkanayon nga matag bunok sa uwan ang ilang grupo mangandam na niini.

Niadtong weekend, ilang girespondehan ang bahin sa mga barangay sa Bulacao, Tabunok ug Linao kini human niabot sa taga tuhod ang tubig nga nilapaw diha sa karsada.

Adunay mga sakyanan nga nakalusot apan adunay mga motorsiklo nga napawongan sa makina.

Matud ni Togonon nga wala usab sila pasagdi sa mga sakop sa City of Talisay-Traffic Operation Development Authority (CT-TODA) tungod kay nitabang kini sa pagpahubas sa tubig baha.

Ilang nakita ang mga basura nga nibara sa kanal hinungdan nga dili dayon makalahos ang tubig hinungdan sa pagbaha.

Nihangyo si Togonon sa katawhan nga unta dili magpasagad sa paglabay sa basura aron sa panahon sa ting-uwan malikayan ang pagbaha. BDB (BANATNEWS)