Pipila ka eskwelahan sa Talisay mopahigayon na sa Brigada Eskwela

CEBU, Philippines — Pipila ka tunghaan sa Dakbayan sa Talisay ang magpahigayon na unya sa ilang Brigada Eskwela.

Ang Brigada Eskwela mao ang programa sa Department of Education (DepEd) sa pagpanglimpiyo ug pag-ayo sa mga naguba nga gamit sa pampublikong eskwelahan sa dili pa magsugod ang klase.

Si Konsehal Eduardo “Digul” Gullas III, chairman sa committee on education nagsugod na usab og pagpanghatag og wooden chairs nga magamit sa mga tinun-an ug magtutudlo.

Matud pa ni Gullas nga andam sila nga moabag sa kalihokan.

Gani iya nang gitapok ang mga konsehal sa barangay nga nagkupot sa komitiba sa edukasyon aron sa pagpaminaw sa ilang mga gikinahanglan alang sa pagpanindot sa mga tunghaan sa ilang dapit.

Usa sa gipangayo sa mga konsehal sa barangay mao ang mga pintal ug ang kagamitan sa pag-ayo sa mga lingkuranan nga nangaguba.

Giklaro ni Gullas nga adunay mga butang nga gipaabot ang mga konsehal nga kinahanglan usab niya nga ipapasar sa konseho.

Sayo pa, padayon si Gullas karon sa pagpanghatag og close circuit television (CCTV) camera ngadto sa mga tunghaan aron mahatagan og seguridad ang mga bata ug magtutudlo.      

Ang mga badlongon nga magbuhat og krimen sa eskwela ang dali na unyang masakpan gumikan kay makita kini sa footage sa CCTV —/BDB (BANAT NEWS)