Opisina ni Kong. Gullas gibuksan diha sa Minglanilla

CEBU, Philippines — Gibuksan na ang satellite office ni kongresista Rhea Gullas sa unang distrito diha sa compound sa University of the Visayas (UV) sa lungsod sa Minglanilla niadtong Martes.

Ang pagbukas sa buhatan gitambungan sa mga opisyales sa unang distrito ug nagkalain-laing opisyales sa rehiyonal nga buhatan sama sa Department of Health (DOH) ug Department of Social Welfare and Development (DSWD).

Si Gullas nibutyag nga dili na molayo og biyahe ang mga konstituwenti gikan sa Sibonga tungod kay naa naman sa Minglanilla ang buhatan.

Matud pa niya nga gikan sa pagkahimugso sa bata hangtud sa pagdako ug pagkamatay aduna silay madawat nga tabang ang mga konstituwente, apil na niini ang tabang pinansyal, livelihood, burial ug uban pa.

Si Shalane Lucero, sa DSWD-7 nipasalig og pag abag sa katawhan sa unang distrito lakip na nasab ang DOH-7 nga maoy kaabag nila ni Lucero.

Ang unom ka mga mayor sa siyudad ug lungsod sa unang distrito mihangop niini tungod kay mapasayon na nila sa pagrekomendar sa ilang mga konstituwenti sa pagdangop sa buhatan sa kongresista. (BANAT NEWS)