P2 milyones kita sa kalungsuran sa R`Cebu Trade Fair

CEBU, Philippines — Moabot sa kapin P2 milyones ang nahimong kita sa kalungsoran atol sa gipahigayon nga mga R'Cebu sa usa ka mall sa dakbayan sa Sugbo.

Ang R'Cebu Trade Fair usa ka inisyatiba sa Probinsya sa Sugbo nga nagsuporta sa mga lokal mga magpapatigayon pinaagi sa paghatag og lugar o venue niini sa mall kon asa mamahimong madisplay ang mga baligya niini ngadto sa mga kustomer ilabina ang mga anaa sa dakbayan.

Sa taho sa Provincial Tourism Office atol sa gipahigayon sa Provincial Development Council Meeting (PDC) niadtong Oktubre 15, moabot sa P2, 687, 451 ang nakolekta nga halin sa mga lungsod ug siyudad sa lalawigan sa Sugbo.

P340, 000 ang halin sa mga LGUs sa primero distrito; P583, 658 usab ang sa segundo ug sixto distrito; P368, 567 ang kita sa mga lungsod sa tersero distrito; P540, 758 ang sa kinto distrito, ug P150, 158 ang sa septimo distrito.  Nagkadaiyang produkto gikan sa agrikultura, delicacies ug uban pang lokal nga produkto ang makita sa R'Cebu.

Nagsugod kini niadtong tuig 2021 o atol sa panahon sa pandemya nga karon nahimo na nga tinuig nga kalihokan.

Samtang, gitaho sa Provincial Tourism Office nga moabot sa P4.5 million ang halin sa mga LGUs atol sa gipahigayon 1Cebu Expo niadtong Agosto 21-27, subay sa usa ka bulan nga selebrasyon sa ika-455 nga kasumaran sa Probinsya.

Ang 1Cebu Expo susama ra sab sa R'Cebu diin ang mga lokal nga magpapatigayon hatagan og lugar aron makadisplay og baligya sa ilang produkto sa usa ka mall sa dakbayan sa Sugbo. (CEBU NEWS)