Brigada Eskwela gikatakda tunga-tunga sa Agosto

CEBU, Philippines —  Ang Department of Education (DepEd) nitakda karong Agosto 14 hangtud 19, 2023 isip Brigada Eskwela ug ang pagbukas sa klase alang sa school year 2023-2024 sa Agosto 29, 2023.

Ang Brigada Eskwela (BE) usa kini ka nationwide nga programa sa pagmentinar sa eskwelahan nga nag-apil sa tanang stakeholders sa edukasyon sa paggahin sa ilang panahon, paningkamot, ug resources sa pagsiguro nga ang mga publikong eskwelahan andam na sa pagbukas sa klase.

Ang kalihokan sulod sa unom ka adlaw tambongan sa mga lokal nga komunidad, ginikanan, alumni, civic groups, lokal nga negosyo, non-non-government organizations (NGOs), pribadong indibidwal, magtutudlo ug estudyante kinsa moboluntaryo sa ilang oras ug kahanas alang sa pagpanglimpiyo pag-ayo sa mga guba ug maintenance work diha sa mga classroom.

Si Bise Presidente ug Education Secretary Sara Duterte nagpadala na og memorandum kalabot sa pagpahigayon sa Brigada Eskwela.

Ang tanang mga rehiyon ug mga division sa eskwelahan gimandoan sa paghatag og lapad nga suporta sa mga school head.Isip usa ka unang lakang niini nga kalihokan mao ang pag-assess sa pisikal nga mga pasilidad ug maintenance nga kinahanglan eskwelahan nga angaya’ng buhaton ingon man sa pag-ila sa uban nga mga panginahanglan sa pag-abli sa klase. Nagpabiling gidili ang solicitation og pagpangayo og bisan unsa nga matang sa kontribusyon alang sa Brigada Eskwela gikan sa mga ginikanan o legal guardian, mga boluntaryo, partners, ug stakeholders apan ang mga donasyon mahimong dawaton.

Giklaro usab nga ang mga kawani sa eskwelahan dili mo-require sa mga ginikanan bugti sa dugang puntos sa grado sa estudyante.

Hinuon, ang mga tunghaan gilaoman nga mohimo uo lapad nga public awareness campaigns aron sa pagpasiugda ug pagdasig sa pag-apil sa Brigada Eskwela nga mahimong maglakip sa dissemination sa advocacy materials ug pagpahigayon sa awareness campaigns.

Ang pakigtambayayong sa pagpalihok alang sa boluntaryong tinubdan lakip ang materiyales, manpower ug mga boluntaryong serbisyo alang sa pagpahigayon sa Brigada Eskwela ubos sa pagsunod sa RA 5546 mahimo usab nga matukod.

Ang mga eskwelahan kinahanglang maghimo og Memorandum of Agreement (MOA) o Memorandum of Understanding (MOU) nga nagtino sa mga tahas ug responsibilidad sa mga habig nga nalambigit ang eskwelahan ug partners.

Ang pag-monitor ug pagdokumento sa tanang mga donasyon ug mga nahimo kinahanglang i-record. Gikan sa The Freeman, BDB (BANATNEWS)