Kapin 40 ka delegado mosalmot  sa wyd2023 sa Portugal

CEBU, Philippines —  Moabot sa sobra 40 ka mga delegado ang ipadala sa Archdiocese of Cebu alang sa World Youth Day 2023 sa Lisbon Portugal nga himoon gikan August 1-6, 2023.

Matud pa ni Niña Barbadillo, WYD20223 member, niabot sila ngadto sa kanhi 90 kapin nga gustong moapil sa maong kalihukan apan tungod sa daghang nasugatan nga challenges niabot na lang sila ngadto sa 50 hangtud nga niabot na ngadto sa 43 ka delegado ang aduna nay visa. Ang mga delegado gilangkuban sa kaparian, consecrated women, youth ug lay collaborator.

Dugang pa ni Barbadillo, giandam na usab nila ang mga kalihukan dinhi sa local aron kung unsay matagamtam nila sa Lisbon, mao usab ang masinati sa youth sa Archdiocese of Cebu.

Si Fr. Andrei Ventanilla, ang Chairman sa Commission on Youth, nitug-an nga matag delegado maoy niabaga sa ilang galastohon sa ilang tagsa-tagsa ka mga biyahe.

Gibutyag ni Ventanilla, human unya sa ilang pag-apil sa kalihukan sa Lisbon, magtigum usab silang mga delegado aron tukion kung unsa nga mga kalihukan nga ilang ipaambit alang sa Local World Youth Day. Ang Arsobispo sa Sugbo Archbishop Jose Palma, nitug-an nga daghan nang mga WYD ang iyang naapilan ug ang sa Pilipinas maoy pinakadaghan nga niapil niini nga gitambongan sa Santo Papa.

Dugang ni Palma nga posibleng mao na kini ang kataposan niyang pagsalmot sa kalihukan tungod kay hapit na man usab siya mo-retiro. (BANAT NEWS)