Pantalan tukoron sa Santa Fe

CEBU, Philippines —  Bag-ong pantalan ang tukoron sa Probinsiya sa Sugbo sa Santa Fe, isla sa Bantayan, amihanang bahin sa Sugbo.

Atol sa iyang pakigtigom sa mga opisyal ug tourism stakeholders sa lungsod sa Santa Fe niadtong Hunyo 27, si gobernadora Gwendolyn Garcia mipahibalo nga ang Cebu Port Authority (CPA) nihatag na og pagtugot sa Kapitolyo nga maoy motukod sa bag-ong pantalan nga gibanabana nga mogasto og moabot sa P500 million.

Ang pagtukod sa bag-ong pantalan gitinguha aron masulbad ang padayon nga sand erosion o pagkalkal sa balas didto sa maong area.

Matud ni Garcia nga samtang trabahoon ang bag-ong pantalan, sulbaron usab sa kapitolyo ang problema sa kasamtangang Santa Fe port nga matod pa maoy hinungdan sa dili makiangayon nga bahin sa balas. 

“Samtang naghimo ta sa bag-ong port, duna tay buhaton anang existing nga patagaan gyud og kaagian ang tubig, aron ang kaning padayon nga pagkalkal ma mitigate nato ba. Grabe na kaayo ang sige og kalkal” matud ni Garcia. 

Sumala sa Gobernador nga ang kasamtangang pantalan nga konkreto nakababag sa agas o agi sa tubig dagat.

Sa laing bahin moabot sa P5.5 milyones nga proyekto ang gibubo sa Probinsy sa Sugbo ngadto sa Bantayan District Hospital.  Si Gobernador Gwendolyn Garcia maoy nangulo sa inugurasyon sa nagkadaiyang proyekto didto sa maong tambalanan.

Matud ni Dr. James Nicholas Najaro ang chief of hospital sa BDH nga ang Kapitolyo mopondo usab sa pagpatukod sa tulo ka andana nga edipisyo nga mokantidad og P54.5 milyones nga gamiton aron adunay dugang hospital bed ang mabutang alang sa mga pasyente.

Ang Bantayan District Hospital sa pagkakaron adunay 25 bed capacity ug gitinguha kini sa Probinsiya nga ma upgrade ngadto sa level 1 hospital nga maka accomodate og 100 ka mga higdaanan.

Sumala sa Capitol Information Office, ang gobernadora niaprobar usab sa request nga dugangan og mga doktor ug nurse lakip na mga higdaanan ug ubang ekipo ang maong hospital. — MEL (BANATNEWS)