Luna sa DA ug BFAR bawion na sa Kapitolyo

CEBU, Philippines —  Nakigtagbo si Gobernador Gwendolyn Garcia sa mga opisyal sa Department of Agriculture–7 ug sa Bureau of Fisheries and Aquatic Resources (BFAR-7) alang sa plano sa Kapitolyo nga mabawi ang luna nga giokupahan kaniadto sa nahisgotang ahensya.

Sa panagtagbo, nahisgutan ni Garcia uban sa regional executive director sa DA nga si Angel Enriquez ug BFAR-7 director Allan Poquita ang tinguha sa Kapitolyo nga mapanag-iya og balik ang propedad nga nahimutang sa dalan M. Velez sa dakbayan sa Sugbo.

Ang maong propedad maoy gitukoran kaniadto sa karaan nga regional office sa DA ug kun asa kasamtangang nahimutang ang BFAR-7 office.

Kabahin gihapon kini sa lakang nga gihimo karon sa Kapitolyo pagbawi sa mga luna o propedad niini nga gidonar kaniadto apan wala magamit subay sa napirmahan nga deed of donation.

Sa taho sa Capitol Information Office wala pay kasabotan nga nakab-ot ang Kapitolyo ug ang maong ahensya atol sa ilang tigom apan gipaabot nga subling magtigum ang mga opisyal aron ipadayon ang negosasyon. (BANAT NEWS)