470 ka sakyanan dakpan sa operasyon sa Lto sa Bohol

CEBU, Philippines — Niabot ngadto sa 470 ka mga sakyanan ang nadakpan sa mga tinugyanan sa Land Transportation Office LTO Central Visayas sa ilang subsub nga operation nga gipahigayon sa probinsya sa Bohol.

Ang LTO- nagpahigayon ug random roadworthiness inspection sa Bohol ubos sa giya sa ilang ilang regional Director Victor Emmanuel Caindec.

Sa gihimo nga lima ka adlaw nga random inspection nga nagsugod niadtong April 24, 2023 niabot ngadto sa 335 ka mga sakyanan ang naisyuhan ug electronic temporary operator’s permits kon E-TOP.

Samtang 135 ka mga sakyanan ang gidala sa impounding unit tungod sa mga bug-at nga violations.

Si Caindec, unang nipahibalo sa iyang personal nga facebook account nga ang mga personnel sa LTO-7 mohimo ug inspections sa isla nga naila sa Chocolate Hills.

Ang mga lugar nga gihimoan ug inspection mao ang Tagbilaran City, ug sa lungsod sa Loon, Baclayon, Alburquerque, Jagna, Dauis, Panglao, Danao ug Talibon.

Gipahibawo ni Caindec nga kadaghanan sa mga na impound nga sakyanan mga motorcycles diin 111 ka mga motorista niuli sa ilang balay nga wala nay gisakyan.

Ang mga kalapasan nga nahimo atol sa pagpanakop mao ang pagmaneho nga walay valid license, pag maneho nga walay valid vehicle registration ug expired na ang ilang rehistrasyon.

Ang maong operation natigayon nonot sa pakig-alayon sa LTO-7 ngadto sa Bohol Provincial Police Office ubos sa pagpangulo ni Provincial Director PCOL. Lorenzo Batuan.  — MEL ( Banat News )