Pagbukas sa Fire Prevention Month gisugat og duha ka insidente sa sunog

CEBU, Philippines — Ang unang adlaw sa pagbukas sa Fire Prevention Month kaghapon gisugat kini og sunog nga naglambigit sa residential diha sa Block 9, Lot 50 Deca Home sa Barangay Jagobiao, Dakbayan sa Mandaue ug sakyanan nga nasunog diha sa South Road Properties sa Dakbayan sa Sugbo.

Ang balay nga nasunog kagahapon sa kadlawon gipanag-iya ni Sheryll Tabernero diin napawong usab dayon sa kabomberohan ang kayo sa sunog.

Matud ni Mandaue City Fire Marshall Arnel Abella, nga electrical ignition due to loose connection ang hinungdan sa maong sunog.

Gimando ni Mayor Jonas Cortes ang pagpakatap sa mga kasayuran ngadto sa hilit nga mga dapit sa kabarangayan alang sa paglikay sa trahediya sa sunog.

Ang kalihokan sa Mandaue gisugdan kini sa Santos nga Misa diha sa Parkmall.

Laing sunog ang niulbo diha sa Cebu City Bound Lane CCLEX sa Barangay Mambaling, Dakbayan sa Sugbo, alas 9:15 sa buntag diin naglambigit kini og sakyanan nga gipanag-iya ni Ford Guardo apan napawong usab dayon ang kayo.

Walay gikataho nga naangol sa maong mga hitabo.

Subay niini, base sa mensahe sa BFP sa pagbukas kagahapon sa fire prevention month nga dili lang buwan sa Marso ang fire prevention apan kada adlaw kini.

Nunot sa maong kasaulogan ang BFP nipahigayon kini og funwalk, motorcade sa  fire trucks ug uban pa.

Samtang sa Dakbayan sa Talisay, ang mga pre-schooler gitudloan sa kabomberohan sa siyudad sa paggunit sa fire hose sa pagpawong sa kayo.

Ang kalihokan sa siyudad gisugdan kagahapon sa Santos nga Misa diha sa Talisay City Fire Station sa compound sa Talisay City Hall. — Decemay P. Padilla, Gabriel C. Bonjoc, Romeo T. Limpangog (BANATNEWS)