Opisyal nga mga kandidata sa Miss Mandaue 2023 gipresentar
CEBU, Philippines — Gipapirma na og kontrata isip opisyal nga kandidata sa Miss Mandaue ang nag-una nga 12 ka maanyag nga mga babaye nga napili atol sa gihimong screening.
Nasayran nga mikabat sa 26 ka maanyag nga babaye ang misalmot sa gipahigayon nga screening sa Miss Mandaue 2023.
Kining maong mga babaye mipakita sa ilang kaanyag ug kalantip sa pangisip nga usa ka ehemplo nga mapakita sa usa ka tinuod nga Mandauehanon.
Human sa ilang pagpirma sa kontrata gitauran sila og sash sa mga sakop sa screening committee ug gideklarar nga official candidate sa tinuig nga indigay sa kaanyag.
Mitambong sa gihimong sashing ug Contract Signing Ceremony mao ang Reigning Miss Mandaue Jewel Alexei Buot Image uban sa mga opisyales sa siyudad sa Mandaue sama nila ni Hon. Marie Immaline Cortes-Zafra, Hon. Jennifer del Mar ug Miss Mandaue Chairwoman Ms. Gwynn Christine Lumapas- Tianero.
Sa nasayran ang pagahimoon nga Miss Mandaue 2023 maoy kabahin sa gihan-ay nga mga kalihokan sa matag tinuig nga pangilin ni Senyor San Jose nga maoy patron sa siyudad nga gikatakdang himoon karong Mayo 8. - MEL (BANATNEWS)
- Latest
