CAC naglaum nga makabaton og 4-digit hotline ang Talisay
CEBU, Philippines — Giangkon sa presidente sa City Advisory Council CAC sa Talisay nga si Cyril Velasco nga dili sayon ang ilang gitinguha nga pagbaton og 4-digit hotline number sa siyudad sa Talisay.
Suma pa ni Velasco nga kini tungod sa kadaku sa magasto niini nga gibana-bana nga moabot sa halos tunga sa milyon ka pesos.
Una niini tinguha sa siyudad nga makabaton sa maong hotline number aron dali ra nga mahinumduman sa mga tawo panahon sa emerhensiya ug dali ra usab ang pagresponde sa mga otoridad.
Hinuon gitug-an ni Velasco nga wala nila sirhi ang posibilidad nga makabaton gyud sa 4-digit hotline number.
Subay niini nagpadayon ang ilang pakigsabot sa telecommunication companies kabahin sa maong tinguha.
Apan dugang pa ni Velasco nga kun dunay igong partisipasyon sa tanang sektor dili lisod nga makab-ot ang ilang tinguha. /MEL (BANAT NEWS)
- Latest
