Nangawat sa mga tabon sa manholes nailhan na

CEBU, Philippines — Nailhan na sa mga otoridad sa Mandaue City ang matud pa responsable sa mga pagpangawat og tabon sa mga manholes sa Barangay Bakilid.

Si Police Major Romeo Caacoy Jr., hepe sa Mandaue City Police Office (MCPO) Station 2 sa Barangay Subangdaku mingon nga giduso na nila sa city hall ang mga impormasyon kabahin sa maong tawo alang sa pagpasaka og kaso batok niini.

Matud pang Caacoy ayha lang sila mopagawas sa pangalan niini kun masang-at na sa siyudad ang kaso batok niini.

Gibutyag ni Caacoy nga natumbok ang maong suspek pinaagi sa tanang nahipos nilang impormasyon ug koordinasyon gikan sa tanang police stations sa siyudad human nadiskubrehan ang pagkahanaw sa mga tabon sa mga manholes ug imburnal sa maong barangay.

Base sa pasiunang imbestigasyon posibleng miyembro lang sa usa ka grupo ang maong lalaki nga ilaha nang natumbok. Gituohan nga ang maong grupo maoy responsable sa mga pagpangawat sa mga gipanagiya sa gobiyerno sama anang mga tabon sa manholes ug mga imburnal nga gigamitan og steel bars.

Matud pa ang maong lalaki luwan og motorsiklo nakuhaan sa CCTV camera sa Barangay Bakilid nga aktong gikuha ang puthaw nga tabon sa manhole diha sa L. Jayme St. niadtong kaadlawon sa Enero 24, 2023. Base sa kuha sa CCTV, ang maong lalaki nagpakaaron ingnong nangihi duol sa maong tabon samtang nagpunay kini og lingi-lingi sa palibot. Human niini gitarog niya og aswat niya ang tabon ug mibiya.

Apan dangtan ang pila ka minutos, mibalik kini ug gipadayon ang pagligwat sa tabon dayon gikarga kini ngadto sa iyang motorsiklo ug misibat.

Ang kapolisan gikatakda karong mosubay sa tanang mga nangawagtang nga mga butang nga iya sa gobiyerno diha sa Bakilid, Tipolo, ug Subangdaku aron pagsuta kun unsa pa ang mga gipangkawat.

Si Atty. John Eddu Ibañez, executive secretary ni Mayor Jonas Cortes daan ng mipahibalo nga kun mailhan ang responsible aning mga pagpangawat pasakaan gyud sa siyudad og mga kaso.

Apil sa kasohan sa siyudad ang mga tagiya og mga junkshops nga mamalit aning mga kinawat nga iya sa siyudad tungod sa paglapas sa Presidential Decree No. 1612 o  Anti-Fencing Law. Nasayran sab nga gawas sa mga tabon, daghan sab mga reflectorized lights sa M. Logarta Street sa Subangdaku flyover ang giingong nangawagtang.

Ang mga reflectorized lights gituyo paglubong diha sa mga dalan aron magsilbing giya sa mga motorista panahon sa kagabhion. Mao sab kini ang nag-ulang sa managlahing lanes aron masigurong dili magkabanggaanay ang mga nagsugat-sugat nga mga sakyanan.

Aron mapakgang ang mga susamang hitabo, pangusgan sa kapolisan ang foot patrols niini sa kadalanan kauban ang mga barangay tanod ug mga volunteers.

Gitambagan sab ni Caacoy ang mga opisyales sa mga barangay nga magmabinantayon kanunay ug maniid sa ilang palibot ilabi na panahon sa gabii. (BANAT NEWS)