Mga menor na nalambigit sa rambol sa Talisay gisulod sa rehab

CEBU, Philippines — Upat ka batan-on nga nalambigit sa rambol sa Barangay Dumlog, Dakbayan sa Talisay ang gisulod na sa rehab facility.

Samtang ang diversion program nga gitambongan sa 36 ka menor de edad ang nasugdan na og linain nga intervention ang gihimo sa City Social Welfare and Development ngadto sa mga bata.

Sukad sa nilabay nga semana wala nay nadawat nga reklamo sa mga panagrambol sa mga batan-on bisan asang dapit sa Siyudad sa Talisay human sulod na sa duha ka gabii gihimo ang kabahin sa diversion program.

Subsob nga pakighinabi alang sa behavior rehabilitation ang gihimo sa mga polis uban ang mga GAD focal ug kadagkoan sa CSWDO ngadto sa maong mga batan-on.

Nasayran nga 36 ka batan-on ug 19 ka ginikanan ang niapil sa duha ka managlahi nga tapok.

Matud ni Felipa Solana, pangulo sa CSWDO nga upat ka batan-on nga nalambigit sa rambol ang nasulod sa ilang pasilidad.

Samtang ang mga ginikanan ug guardian ang gi-assess usab ug gipaubos sa intervention.

Ang Talisay City Police Station nihimo kini og senemana nga friendly basketball game uban sa ilang hepe Police Lieutenant Colonel Randy Caballes uban usab sa mga drug surrenderee sa matag barangay.

Niadtong adlaw’ng Huwebes gisugdan ang maong kalihokan diha sa Barangay Biasong. (/BDB) (BANAT NEWS)