300 mil miduyog sa walk with Jesus

CEBU, Philippines — Opisyal nang gibuksan, Huwebes sa buntag ang ika- 458th nga kapistahan ni Sr. Sto. Niño pinaagi sa gipahigayon nga Penitential Walk with Jesus nga g gisalmotan kini sa mga deboto nga gikan sa nagkadaiyang dapit sa Sugbo bisan kadtong mga dumuduong.

Niabot sa kapin 300 mil ka mga deboto ang nikuyog sa prosisyon matud ni Cebu City Police Office Director Colonel Ireneo Dalogdog  base sa datos gikan sa Cebu City Disaster Risk Reduction and Management Office (CCDRRMO).

Matud ni Dalogdog nga sa pakighinabi niya kang Harold Alcontin ang pangulo sa CCDRRMO nga na-doble ang ihap sa mga tawo nga miapil sa maong kalihukan itandi sa kaniadto nga gibanabanang 150 mil.

Pasado alas-tres nag abot-abot ang mga deboto sa Fuente Osmeña, alas kwatro sa kaadlawon gisugdan ang prosisyon nga gipangulohan sa kaparian sa Basilica Minore Del Sto. Niño. Niapil usab sa procession ang first couple sa Dakbayan sa Sugbo Mayor Mike ug Malou Rama. Ang kabugnaw sa panahon wala makapaluya sa mga deboto nga niapil sa maong kalihukan bitbit ang ilang tagsa-tagsa ka mga Santo Niño.

Nagpaabot sa gawas

Bagang duot sa mga tawo ang nagpaabot nang daan sa sulod ug gawas sa basilica nga sa pagbana-bana sa kaparian 35mil sa gawas ug 5mil ngadto sa 7mil ang naa sa sulod sa pilgrim center.

Ang Santos nga Misa gipangulohan ni Rev. Fr. Nelson Zerda, OSA, Rector sa Basilica kinsa miinstalar usab sa bag-o nga Hermano ug Hermana Mayor 2023 na sila si Engr. Venerando ug Dr. Donna Loi Olandria.

Atol sa homiliya ni Zerda,  gipahimug-atan niini ang panultihon nga “Padayon Niño” bahin sa kalipay nga matagamtaman sa pagpanaw dili lang ang padulngan.

Ang mga kaparian nga agustino mapasalamaton sa tanan mga tawo nga nisunod sa mga health protocols bisan taliwala anaa pa ang hulga sa pandemya nga Covid-19.

Human sa Santos nga Misa gisunod gilayon ang hamubo nga Sinulog Traditional Dance nga giapilan sa bagang duot sa mga tawo sa sulod ug sa gawas sa simbahan nga klaro kaayong ilang gikamingawan.

Si Fr. Ion John Miranda, ang tigpamaba sa Basilica nitug-an adunay napulo ka Santos nga Misa ipahigayon matag adlaw sugod alas tres sa kaadlawon hangtud sa alas otso sa gabii.

Kalamposan

Samtang si Police Regional Office(PRO)-7 Director Brigadier General Jerry Bearis masaligon nga ang mga kalihukan sa Fiesta Señor ug Sinulog 2023 magmalampuson gumikan paghiusa sa government agencies, privates sector ug business sector.

“As what I’m always saying this will be a very successful and a fruitful one,” ni Bearis pa.

Gipahibawo sab ni Bearis nga kada adlaw adunay briefing ug debriefing matag human sa mga kalihokan aron makita ang kinahanglang palambuon sa sunod.

“Yung mga lessons learned doon mai-improve na natin, hindi na natin magagawa uli kung meron mang konting dapat i-improve doon sa previous activity so that hindi na magawa uli sa next activity,” ni Bearis pa. (BANATNEWS)