Unom ka quarry sa bukirong barangay gipahunong

CEBU, Philippines —  Moabot ngadto sa unom ka quarry operations sa pipila ka bukirang barangay ang gipaundang sa  kagamhanan sa Siyudad sa Sugbo  ug ang uban niini maoy nakita nga hinungdan nga modako ang level sa baha sa ubos nga bahin niini.

Nasayran nga personal nga nisuta sa area sa niaging adlaw ang  nagdumala sa Task Force Gubat sa Baha nga si  kanhi DENR Secretary Roy A. Cimatu .

Suma pa hepe sa  Cebu City Environment and Natural Resources Office (CCENRO) nga si Arlie Gesta nga ang maong mga  quarry kay nahimutang sa Budlaan, Pulangbato Binaliw ug Agsungot.

Sa taho sa Cebu City Public Information Office , dunay ubang kompanya  kay  nagmina og mga anapog, kulon, diorite ug ubang mga minerales nga gamit sa pipila kg mga industriya ug pamatigayon.

Ang uban niini kay  wala gi-approve ang renewal sa ilang permit, samtang ang uban kay gipa-comply sa ubang requirements aron dili modako ang level sa tubig sa kasapaan.

Sa nangaging mga adlaw  nasinati ang pagbaha sa pipilang bahin nga  duol sa sapa sa Butuanon .

Duna say mga pagdahili sa yuta ang nahitabo sa niaging buwan didto sa  Bonbon, Sirao ug Agsungot gumikan sa sagunson nga mga pag-ulan.

Nasayran nga subsub karon ang kampanya sa kagamhanan alang sa paghatag og proteksyon sa kalikopan.

Pipila ka mga lakang ang gi-umol sa  siyudad pinasubay sa direksyon ni Mayor Michael Rama nga masusama sa Singapore ang dakbayan. (BANAT NEWS)