Orillaneda Preparasyon sa foot ug fluvial procession gisugdan na

CEBU, Philippines — Nisikad na sa niaging adlaw ang lapad nga pakitigom ni Konsehal Phillip Zafra sa nagkadaiyang stakeholders sa seguridad sa pagbalik na unya sa tradisyonal nga foot ug fluvial processions nga kabahin sa mga kalihokan sunod tuig sa kapistahan ni Señor Santo Niño. Kahinumdoman nga nakapahuway og duha ka tuig ang maong kalihokan gumikan sa pandemya ug tungod kay nilugak naman ang restriksyon karong panahona  nadesisyonan nga ibalik na kini. Si  Zafra kinsa chairman sa committee on peace and order sa konseho nakigtigom dili  pa  lang dugay sa  Philippine Coast Guard, MARINA 7 -7, opisyales sa  Basilica Minore del Sto. Niñ de Cebu, Kapitan Jojo Sable sa  Suba, Kapitan Julius Guioguio sa Barangay  Pasil, Kapitan  Gines Abellana sa Barangay  Mambaling ug mga representante sa Barangay Ermita ug Sawang Calero.

Nagkanayon ang konsehal nga importante kaayo ang koordinasyon  aron mahimong tulin, luwas ug hapsay ang pagpahigayon sa mga prosesyon.

 Giawhag ang mga tag-iya og sakayan nga kinahanglan gyud nga magparehistro gyud sa Coast Guard ug Marina kun buot nilang moapil sa fluvial procession.

“Ang atong naobserbahan sa una, dunay mga sakayan  nga wala ma-rehistro nga mosugat sa fluvial procession. Labing maayo nga mosunod nalang gyud ta sa guidelines para dili mabalda ang kalihokan ,” matud pa ni Zafra sa pakighinabi niini sa Banat News. Gipahimangnoan usab ang operators sa mga sakayan nga mouban sa fluvial nga tumanon gyud ang limitasyon sa kapasidad o gidaghanon sa mga tawo nga makasakay sa ilang bangka aron malikay sa disgrasya. Bisan pa man nga gipaabot ang pagdagsa sa katawhan sa maong mga kalihokan, gitambagan gihapon kini nga magmatngon kanunay .

Lakip sa gikauban ni Zafra sa iyang mga tigom mao sila si  Cebu City Police Office (CCPO) City Director, PCol. Ireneo Dalogdog,  iyang Deputy for Operation nga si PLt. Col. Janet Rafter ug  representante sa SRP Management Office nga si Joemar Abuyabor.

Kalabot sa usab sa foot procession, gipaabot nga modoble ang gidaghanon sa debotos nga mosalmot niini busa doblehon pud ang pagpatuman sa seguridad alang sa maong kalihokan.

“Duna pa ta’y follow -up meetings aron maseguro nga magmalinawon  gyud ang maong kalihokan ,” suma pa ni Zafra pa. Kauban sa kapolisan alang sa pagpatuman sa seguridad mao ang  nagkadaiyang force multipliers. (BANATNEWS)