Dugo gikan sa unlan gisusi kun iya sa 15-anyos

CEBU, Philippines — Nagpaabot pa ang Bogo City  Police Office  sa resulta sa DNA test sa dugo nga nakita sa unlan nga nakuha gikan sa panimalay sa lalakeng person of interest sa kamatayon sa 15 anyos nga babaye.

Ang maong krimen nahitabo sa Purok Magenta, Barangay Gairan sa maong siyudad pipila ka adlaw na ang nakalabay.

Matud pa buot sutaon pinaagi sa DNA test kun motakdo ba ang maong dugo sa swab sample nga gikuha gikan sa biktima. Molanat pa og 45 ka adlaw una pa mogawas ang resulta sa DNA Test.

Gibutyag hinoon sa hepe sa Bogo City Police Station Police Lt. Col. Florendo Fajardo nga giimbitar nila sa police station ang driver og trisikad nga giingong nakadungog sa biktima nga nangayo og tabang pinaagi sa pagtawag sa ngalan sa iyang inahan niadtong Sabado sa buntag sa wala pa makit-i ang biktima sa nahisgutan lugar.

Gidala ang trisikad driver sa crime scene aron itudlo sa kapulisan kun asa niya nadungog ang biktima nga nangayo og panabang.

Ilaha kining gihimo aron hinay-hinay nga masumpay sa kapulisan ang mga panghitabo ingon man mga impormasyon nga ilang nahipos ug mahipos pa sa pagdagan sa ilang imbestigasyon.

“Naka-recall gyud siya nga nagpatabang sa iyahang Mama Mabel, nakadungog siya unya mao ‘to akong giingnan ang imbestigador dal-a duol sa crime scene asa gyud dapita sa iyahang nahinumduman nga nakadungog siya ana para at least maanam-anam namo og connect,” matud ni Fajardo.

Sa impormasyon nga nakuha sa kapulisan sa Bogo City ang biktima matod dili sa lugar diin kini napalgan gipatay.  Gituohan nga posibleng sa laing lugar gihimo ang krimen ug gilabay ra ang biktima sa dapit kun asa kini nakit-an.

Nasayran nga ang National Bureau of Investigation (NBI)-7 nakig-alayon sab sa Bogo City Police Station labot sa maong hitabo aron gyud mahatagan og kasulbaran ang nahitabo sa 15-anyos nga babaye. — /IBM (BANAT NEWS)