Pipila ka karsada sa Opon sirad-an tungod sa pista sa Birhen sa Regla

CEBU, Philippines — Pangsirad-an ang pipila ka mga dalan sa Dakbayan sa Lapu-Lapu atol sa ika-287 nga kapistahan sa Birhen sa Regla karong Nobiyembre 20 ug 21, 2022.

Si  Mayor  Junard “Ahong” Chan sa iyang post sa social media miingon nga magsugod  ang pagsirado sa mga dalan alas- 4  ang takna sa kaadlawon.

Ang mga dalan nga sirad-an mao ang Mantawe Road ug ingon man ang dalan Lopez Jaena hangtod na ngadto sa eskina sa dalan  R.  dela Serna. Dugang pa nga mga dalan nga sirad-an mao ang tibuok dalan Ompad sa Barangay Poblacion, tibuok dalan Mangubat, dalan S. Osmeña, BM Dimataga hangtod na ngadto sa dalan eskina  R.  dela Serna.

Ang maong mga dalan naa duol sa simbahan sa Birhen sa Regla nga gipaabot dagsaon sa mga deboto gikan pa sa nagkalain-laing mga dapit atol sa kapistahan.

Tungod sab niini, gipasidan-an ang mga motorista nga likayan una ang pag-agi sa maong mga dalan aron dili madelatar sa ilang mga biyahe.

Gitambagan sila nga mas maayong planuhon nang daan ang ilang biyahe ug oras aron dili maapektahan sa ilang mga lakaw. — /IBM (BANAT NEWS)