“Oplan Pakigsandurot” banhawon sa dakbayan sa Sugbo

CEBU, Philippines — Gipahibalo ni Konsehal Phillip Zafra sa Dakbayan sa Sugbo nga dunay tinguha karon ang Kagamhanan sa Dakbayan nga banhawon ang Oplan Pakigsandurot (OP).

Matud pa ni Zafra kinsa chairman sa committee on peace and order sa konseho nga kabahin gihapon kini sa kusog nga kampanya batok sa kriminalidad ug ginadiling drugas.

Nagkanayon ang konsehal nga epektibo kaayo ang maong programa sanglit ang mga polis nga nagpuyo sa partikular nga barangay motabang usab sa pagpatuman sa kalinaw sa ilang dapit.

Pinaagi usab sa maong programa, adunay lapad nga pagtambayayong ang mga polis sa barangay opisyal, tanod, mga lider sa sitio ug ubang organisasyon aron masumpo ang mga dautang elemento.

Dugang pa ni Zafra nga ang pagpaniid sa palibot makatabang gyud aron mapugngan ang mga dautang plano sa ubang tawo.

Pinaagi sa kooperasyon, maumol gyud ang kahapsay ug kalinaw sa usa ka dapit. Unang gilusad ang Oplan Pakigsandurot (OP) niadtong 2001 sa panahon ni kanhi

Mayor Tomas Osmeña. — /MEL (BANAT NEWS)