Driving schools moisyu’g certificate bisa’g wala pakita ang estudyante?

CEBU, Philippines — Duha ka mga driving schools  nga giingong nga nagtanyag og “no appearance” nga Theoretical, ug Practical Certificates gimonitor sa mga tinugyanan sa Land Transportation Office Central Visayas.

Si LTO-7 Regional Director Victor Emmanuel Caindec, nitug-an nga ilaha karon gimonitor ang duha ka mga private driving schools human nakadawat sila og taho nga nagtanyag kini og “no appearance” Theoretical and Practical Driving Course Certificates para sa mga gustong makat-on og maneho ug sakyanan aron makakuha og driver’s license.

Sumala pa ni Caindec, ilaha karon giimbestigahan ang maong mga pasangil nga ang maong driving schools mohatag ra og certificate basta mobayad ang nagkuha niini. Matud niya illegal kini.

Subay sa balaod, ang mga gustong magkuha og driver’s license kinahanglang mag-agi og theoretical driving course, dayon actual nga driving lessons human makakuha og student drivers permit, ug sunod dayon ang pagkuha og drivers license kun makapasar sila sa ilang driving lesson, kaning private driving schools maoy motabang kanila pagproseso sa bag-ong aplikante og lisensiya.

Giklaro ni Caindec nga tanan hinoon nga mga private drivig schools ilang gi monitor sa rehiyon. Gitug-an ni Caindec, nga adunay mga driving school nag operate nga dili ubos sa ilang Geographical Areas of Responsibility pero nagbutang sa ilang serbisyo dinhi sa Central Visayas ilabi na sa Cebu.

Gipadayag ni Caindec, gawas sa cancellation sa ilang Accreditation pasakaan usa nila og kalapasan sa Cybercrime Act kining mga private driving schools nga mapamatud-ang wala mosunod sa proseso.

Sa pagka karon adunay dili mominos sa 80 ka mga private driving school ang gi accredit sa Land Transportation Office Central Visayas.

Sa laing bahin, gitug-an ni Caindec nga nagpaabot pa sila og pormal nga proposal gikan sa Cebu City Government may kalabutan sa tinguha sa siyudad nga pagpapahawa kanila diha sa ilang buhatan sa N. Bacalso Avenue ning Dakbayan sa Sugbo.

Giangkon ni Caindec nga ang kasamtangang nahimutangn sa ilang buhatan pabor kaayo para sa  mga dunay transaksyon sa ilang ahensiya sama sa pagkuha og lisensya, renew, rehistro sa sakyanan, ug daghan pang uban.

Naa sab diha ang Malasakit Center nga nakatabang sa special sector sama sa PWD, OFW, Senior Citizens ug mga naapil sa Theoretical Driving School. — /IBM (BANAT NEWS)