Nagkuha’g Police Clearance giposasan

CEBU, Philippines — Wala magdahom ang usa ka lalaki nga buot lang unta mokuha og Police Clearance  nga siya arestuhon sa police human nasuta nga aduna kini standing warrant of arrest.

Nahitabo ang pagaresto alas 9:45 Martes sa buntag diha sa Tagbilaran City Police Station sa Brgy. Cogon, Tagbilaran City, Bohol.  Si Police Lieutenant Colonel Regie P. Real hepe sa Tagbilaran Police miila sa dinakpan nga si Luke Jon Axl Borja 28 , Matud pa ni Real nikuha og Police  Clearance ang dinakpan ug sa pagsubay sa pangalan niini diha sa ilang Data Base nakita nga aduna kini standing warrant of arrest nga giluwatan ni  Zarah Daquila Aguisando Silvosa, Acting Presiding Judge, RTC, 11th Judicial Region, Branch 33, Davao Del Sur.

Matud pa nagatubang kini og kasong kalapasan sa Sec. 5(E) of R.A 9262 o Violence Against Women and their Children (VAWC). Ang korte nagrekomendar og piyansa nga P36 mil alang sa temporary niyang kagawasan.

Ang dinakpan kasamtangan gibalhog karon sa Tagbilaran City Police Station Custodial Facility.— IBM (BANATNEWS)