Garcia: Panudlanan sa siyudad adunay dakong pundo

CEBU, Philippines — Si Cebu City Mayor Raymond Alvin Garcia nipasigarbo nga adunay P12,095,391,052.21 bilyones nga bank cash deposits ang kagamhanan sa siyudad diin iyang gihulagway nga financially healthy ang panudlanan sa syudad.

Ug ang maong kantidad andam kini nga itugyan ngadto sa sa mosunod nga administrasyon ubos sa pagdumala ni mayor-elect Nestor Archival.

Gipadayag ni Garcia nga walay utang ang siyudad diin hingpit na nga nabayran ang South Road Properties Loan.

Gi-itemize sa mayor diin naggikan ang dakong kantidad nga natigom sa siyudad nga gilangkuban sa General Fund nga P7,900,871,190.83; Trust Fund nga P1,547,066,333; Special Education Fund nga P2,521,057,486.70 ug lakip na ang dollar accounts nga nikabat ngadto sa $2,257,071.98.

Matud ni Garcia nga natigom ang dakong kantidad gikan sa mas praktikal nga paggasto sa pundo ug ang ka efficient ug maayong dagan sa kita sa koleksiyon sa mga buhatan sa siyudad lakip niini ang tinuig nga pagsaka sa koleksiyon.

Dugang niini, ang Dakbayan sa Sugbo gipasidunggan sa Bureau of Local Government Finance isip pinakataas nga locally-sourced revenues sa tibuok Region VII. owena D. Capistrano, BDB BANAT NEWS