Pagsul-ob og uniporme dili mandatory – DepEd

CEBU, Philippines — Si Dr. Salustiano Jimenez, direktor sa Department of Education-7 niklaro nga dili mandatory ang pagsul-ob ug uniporme sa mga tinun-an.

Matud ni Jimenez nga bisan pa nga gisabotan sa PTA officials nga kinahanglang mag-uniporme ug aduna sila’y mga balido nga rason apan sila sa DepEd dili mopagawas og kamandoan niini.

Gipadayag ni Jimenez nga adunay daghang dili ka afford sa pagpalit og uniporme sama diha sa kabukiran ug nagkalisod hinungdang dili sila mohatag og kamandoan nga mandatory ang pagsul-ob og uniporme.

Si Jimenez nagkanayon nga kong adunay local government unit o mga tawo nga mopadayag nga mopaluyo alang sa pagpa-uniporme sa tanang kabataan hangopon nila kini ug mohangyo sila nga kong mahimo apilan nalang og kapote alang sa ting-ulan ug tsinelas o sapatos.

Sa laing bahin, bisan pa nga nabutang sa peligro ang luna diin nahimutang ang Buhisan Elementary School sa Barangay Buhisan, Dakbayan sa Sugbo nagpadayon gihapon ang ilang klase.

Niadtong buwan sa Marso karong tuiga girekomendar sa Cebu City Disaster Risk Reduction and Management Office ang pagbakante sa maong luna human nasuta nila ang peligro sa pagdahili sa yuta.

Atol sa pakisusi sa nilabay’ng buwan nasuta ang dagkong mga liki lakip sa principal’s office ug pipila ka mga lawak saringan.

Ug gumikan kay walay kabalhinan nagpahigayon lang usa og blended learning ilabi na sa higayon nga magdaot ang panahon diin ipatuman dayon ang modular learning sa mga tinun-ani samtang gipangitaan og solusyon ang problema. BDB BANAT NEWS