Dalan MC Brione sa Carbon Market hawanan

CEBU, Philippines — Gibutyag ni Cebu City Market Administrator Wendell Cenas nga nakatutok sila karon sa pagpahigayon sa clearing operation diha sa dalan MC Briones sa Carbon Public Market.

Nagpahigayon sila og clearing operation sa dapit diin gasugod sa Police Station 5 padulong na sa Carbon Public Market ug makita ang kausaban sa dalan tungod kay lapad na kini.

Matud ni Cenas nga naghimo na usab sila og consultation sa mga manindahay nga anaa sa module II ug Pawas Carbon Market Unit II diin sunod buwan i-clear usab ang mga manindahay nga anaa sa lugar ug ibalhin diha sa F. Gonzales ug Plaridel Extension.

“Transfer to a appropriate location unya mas nindot, mas hapsay, mas limpiyo unya ang basic lang gyud nga ang dalan para gyud sa sakyanan. Gamay ra ni sila mga less than 200 pero on going ang atoang verification sa inventory unya kanang walay mga ma-displace sulod ra gihapon sila tanan”, pasadayag ni Cenas.

Gihulagway ni Cenas nga resulta sa clearing operation sa maong mga dapit ang agianan nahimo na nga two-way nga maoy tumong sa siyudad.

“Luag gyud siya naturally daghan gyud ang manganhi sa Carbon dili lang mangompra, manuroy na gyud, mura na siya kanang tourist spot na sad siya. Lahi na gyud kaayo”,ni Cenas pa.

Hangyo ni Cenas sa katawhan ilabi na sa mga manindahay sa Carbon Public Market nga mosalig sa kagamhanan sa Siyudad sa Sugbo ilabi na sa liderato ni Mayor Michael Rama diin ang tumong niini mao ang pagpalambo sa siyudad alang sa kaayohan sa tanan. —BDB (BANATNEWS)