Operasyon sa floating cottage sa Talisay isugyot nga i-regulate

CEBU, Philippines — Ang makita nga floating cottage diha sa kadagatan sa Barangay Poblacion, Dakbayan saTalisay giingong family use lang kini.

Kini maoy gipasabot sa tag-iya sa floating cottage nga si George Aznar.

Matud ni Aznar nga sa upat ka floating cottage ang usa niini gikan sa Lungsod sa Cordova human gihunong ang operasyon niini.

Ang floating cottage namatikdan kini niadtong weekend ug ang mga nakit-an nga naligo kaila ra sa pamilyang Aznar.

Si Aznar nagkanayon nga bisan pa og personal use ang floating cottage ilang gisiguro nga walay hugaw sa tawo ang maadto sa kadagatan.

Apan gipahibawo ni Aznar nga nagplano sila nga himuon usab kini nga negosyo ug mosunod sila sa gikinahanglan nga mga rekisitos. Matud usab ni Aznar nga makadugang sa turismo ang floating cottage ug makatabang sa panginabuhi sa mga Talisaynon.

Si Bise Mayor Richard Francis “Choy” Aznar nagkanayon nga niadtong Lunes lang siya nahibawo sa floating cottage.

Ang bise mayor pag-umangkon kini ni George.

Matud ni Bise Mayor Aznar nga gikinahanglan una nga mokuha og saktong dokumento sa pag-operate sa floating cottage.

Ang Bise Mayor morekomendar sa paghimo og ordinansa aron pag-regulate sa floating cottage tungod kay dili sila motugot nga mapareha unya sa nahitabo sa Lungsod sa Cordova nga nakontaminado ang ilang kadagatan.

Samtang si Mary Jane Enrile, pangulo sa Business Permit and Licensing Office nibutyag nga lakip sa mga basic nga rekisitos sa pagbukas sa negosyo mao ang pagkuha og permit sa city health office alang sa sanitation, permit sa Bureau of Fire Protection ug uban pa. —BDB (BANATNEWS)