DILG midasig sa siyudad pag-isyu og safety seal sa mga patigayon

CEBU, Philippines — Gidasig sa Department of Interior and Local Government ang kagamhanan sa Dakbayan sa Sugbo sa pag-isyu og Safety Seal Certification sa mga establisamento nga nagsunod sa minimum health protocols.

Kini atol sa orientation nga gitambongan sa mga representante sa Business Permit and Licensing Office, Public Information Office, Cebu City Disaster Risk Reduction and Management Office, Philippine National Police ug sa Bureau of Fire Protection.

Ang Safety Seal Certification Program nagpamatuod nga ang usa ka establisamento nituman sa public health standards nga gitakda sa gobyerno aron ang ilang mga kustomer makasiguro nga luwas nga mosulod sa establisamento.

Suma ni Cresencio Antolin Aseniero, Local Government Operations Officer (LGOO) sa DILG nga ang safety certificate dili pa requirement sa pagkakaron apan posibleng imando kini sa nasudnong kagamhanan sa umaabot nga mga adlaw.

Gidugang ni Aseniero nga mopadala sila og suwat kang Mayor Rama aron hangyoon nga moisyu og Executive Order, ingon man mangayo usab sila og draft sa dokumento.

Base sa DILG Memorandum Circular No. 2021-053, ang mga LGUs gitahasan sa pag-isyu og safety seal sa mga mall, wet market, retail store, restaurant, fast-food chain, kan-anan, coffee shop, bangko, money changer, pawnshop, remittance center, car wash, laundry service, art gallery, library, museum, zoo, sports center, public terminals, simbahan ug ubang mga dapit sa pagsimba, casino, social event venues, tutorial ug review centers, gym, spa, sinehan, dental clinic, arcade, ug uban pa.

Mahimong balido ang Safety Seal sulod sa unom ka bulan gikan sa petsa sa pag-isyu ug pwede kini nga ma-renew. MEL (BANATNEWS)