Konseho sa Talisay naalarma na sa sakit nga dengue

CEBU, Philippines — Gusto sa konseho sa Dakbayan sa Talisay nga pangusgan pa ang pakigbatok sa dengue nga mao karon ang nag-una nga suliran sa siyudad.

Si Bise Mayor Richard Francis “Choy” Aznar, kinsa maoy chairman sa committee on Health nagkanayon nga nikunhod man tuod ang kaso sa dengue karong semanaha apan dili pa gyud siya kampante niini.

Gusto niya nga pahingusgan pa ang mga lakang aron sa pakigbatok sa makamatay nga lamok nga nisibaw karon panahon sa ting-uwan.

Asoy pa niya nabaraw ang ilang misting sa miaging adlaw tungod sa kadaghang request gikan sa nagkalain-laing barangay.

Hinuon nabalik na ang operasyon sa dihang nakapalit na og dugang nga kemikal. Gawas sa misting tinguha ni Aznar nga padayonon gyud sa katawhan ang pagpanglimpyo kay ang lamok diha ganahan sa hugaw nga palibot.

Ang dengue task force padayon sa pagsuroy-suroy sa kabarangayan sa pag awhag sa katawhan bahin sa pagpanglimpyo. (BANAT NEWS)