Dalan Colon himuong pilot area sa discipline zone

CEBU, Philippines — Ang bag-ong natukod nga Cebu City Traffic Management Coordination Committee mopatuman og traffic discipline zone alang sa public utility vehicles (PUVs) ug commuters diha kadalanan sa siyudad.

Base sa taho sa Public Information Office sa siyudad nga apil kini sa gituki sa komitiba atol sa ilang labing unang tigom niadtong Miyerkules nga gipangulohan sa chairman niini Atty. Rico Rey Francis “Koko” Holganza ang kabahin sa higpit nga pagpatuman sa loading ug unloading zones.

Base sa obserbasyon ni Holganza nga pipila ka mga moderno ug tradisyonal nga public utility jeepneys (PUJs) mohunong lang kini sa bisan asang lugar aron mopasakay og mga pasahero hinungdan nga mohuot ang dagan sa trapiko.

Tumong sa komitiba nga mapatuman ang traffic discipline zone sa tibuok dakbayan ug ilang gitudlo ang dalan Colon isip pilot area.

Sa laing bahin, gibutyag ni Paul Gotiong, officer-in-charge sa Cebu City Transportation Office nga nagbutang sila og bag-o ug tin-aw nga traffic signages diha sa mga designated area nga daling makit-an sa mga drayber ug commuter.

Atol sa tigom, ang komitiba nipalabang usab og resolusyon nga naghangyo sa CCTO nga hingusgan ang pagdakop sa dili awtorisado nga paggamit sa mga siren ug blinker sa mga pribadong sakyanan.

Sa laing bahin usab, nabantayan nga nimenos ang mga disgrasya diha sa Cebu South Coastal Road sa Dakbayan sa Talisay sugod niadtong niaging semana.

Matud ni Jonathan Tumulak, pangulo sa City of Talisay-Traffic Operation and Development Authority (CT-TODA) nga kaniadto makaalarma sila og tag lima ka disgrasya diha sa kadalanan.

Apan sa dihang nasugdan nila ang pagsita sa mga nagmotorsiklo nga dili mosubay sa outer lane nikunhod usab ang disgrasya.

Si Tumulak nagkanayon nga usa lang ang ilang natala nga disgrasya niadtong nilabay nga semana ug usa usab karong semanaha.

Lakip sa sitahon sa CT-TODA ang nagmaneho og sakyanan kong makita nga diha kini nisubay sa outer lane nga nakababag sa nagmotorsiklo. —Gabriel C. Bonjoc/BDB (BANATNEWS)