P8.11 milyones nga pundo alang sa QRF sa Cebu City aprobado na
CEBU, Philippines — Giaprobahan sa Cebu City Council ang resolusyon nga mag-allocate og P8.11 milyones sa Quick Response Fund sa Local Disaster Risk Reduction and Management 2022 alang sa manpower augmentation sa medical officers, medical technologists, ug nurses sa Cebu City Emergency Operations Center (EOC).
Si Konsehal Joel Garganera, EOC deputy chief implementer maoy nangamahan sa resolusyon nga giaprobahan sa konseho.
Matud ni Garganera nga gipalapdan sa EOC ang ilang public health workforce sa dakbayan ilabi na sa pagmontar og case investigation, contact tracing, active monitoring ug vaccination drive pinaagi sa pag-deploy og lima ka medical officers, lima ka medical technologists ug 20 ka nurses.
Base sa project proposal sa EOC ang rate sa medical officer III anaa sa P2,768.23; ang nurse II anaa sa P1,526.14; ug ang medical technologist II anaa sa P1,526.13.
Kini nga period naggikan sa buwan sa Enero hangtud sa Hunyo 2022.
Ang City Disaster Risk Reduction and Management Council (CDRRMC) nirekomendar usab sa konseho nga pabayron ang manpower supplementation sa tanang clusters ubos sa EOC aron pagtubag sa COVID-19 pandemic sa kantidad nga P8.11 milyones ubos sa QRF sa LDRRM 2022.
Sa ikaduhang paragraph sa Section 21 sa Akta Republika Numero 10121 kun “Philippine Disaster Risk Reduction and Management Act of 2010”, nagkanayon nga sa kantidad nga gigahin alang sa LDRRMF 30 porsyento ang igahin isip Quick Response. Fund (QRF) o stand-by fund alang sa relief ug recovery programs.
Ang EOC sa dakbayan pormal nga gimugna pinaagi sa City Ordinance No. 2624 niadtong Oktubre 5, 2021 aron maglatid sa mga lagda, pamaagi ug mga giya alang sa emerhensiya, pandemiya, ug uban pang krisis sa panglawas sa Dakbayan sa Sugbo. BDB (BANATNEWS)
- Latest
