CCDRRMC nangandam sa grand rally sa BOPK

CEBU, Philippines — Gikatakda karong Sabado ipahigayon ang grand rally sa Bando Osmeña Pundok Kauswagan (BOPK) diha sa Cebu City Sports Center ug sa ilahang kalihokan giimbitar nila si vice presidential candidate Tito Sotto.

Ug aron dili na masubli pa ang nahitabong insidente sa “Arat na Cebu”  diin daghan ang naangol gumikan sa kadaghan sa tawo ang Cebu City Disaster Risk Reduction and Management Council ingon man ang Emergency Operations Center Cebu City nihimo na og mga pagpangandam sa kalihokan sa BOPK.

Matud ni Atty. Gerry Carillo, chairman sa Cebu City Disaster Risk Reduction and Management Council nga nakig-estorya na sila sa organizer sa maong kalihokan ug gihan-ay na nila ang measures nga gikinahanglan.

Pipila sa measures nga ilang ipatuman mao nga diha pa lang daan Police Station 2 magbutang na sila og barikada aron usab ma-check ang mga tawo kon aduna bay mga ginidili nga gipangdala ug  aron usab hapsay ang ilahang pagsulod sa Cebu City Sports Center.

Giingong ablihan ang ikaduhang gate sa CCSC aron anha moagi ang VIPs ug kon  daghan gyud ang tawo ablilhan nila ang ikatulong gate.

Nasayran nga ang CCSC adunay tulo ka gate access, una diha duol sa St. Vincent Hospital, ikaduha diha sa Abellana ug ikatulo atbang sa Asian College of Technology.

Samtang si Konsehal Joel Garganera, pangulo sa Emergency Operations Center Cebu City nagkanayon nga sa pakighinabi niya sa kadagkoan sa Cebu City Police Office nasayran niini nga moabot na sa 400 ka polis ang i-deploy sa umaabot nga kalihokan karong Sabado.

Sila usab sa EOC Cebu City mo-augment sa Quick Response Team ug aduna sab sila’y in-house medical facility nga mo atiman sa mga tawo nga magkinahanglan og medical attention.

Gihulagway usab ni Garganera ang lugar nga pahigayonan sa kalihokan nga walay problema tungod kay open air ug hangyo niya nga dili tugotan nga makasulod kadtong dili mag-face mask ug giawhag niini nga kon mahimo vaccinated ang makatambong sa kalihokan.

Ug kong pwede usab dili magdala og menor de edad aron malikayan ang mga dili maayong panghitabo ilabi na kon adunay dinut-anay sa mga tawo. —BDB (BANATNEWS)