CCFO naalarma sa sagunson nga sunog sa Cebu City
CEBU, Philippines — Naalarma ang mga kadagkoan sa Bureau of Fire Protection partikular ang Cebu City Fire Office niining sagunson nga insidente sa sunog sa unang semana palang sa bulan sa Marso nga mao sab ang bulan sa pagtimaan unta sa Fire Prevention Month.
Sa unang semana palang, unom na ka insidente sa sunog (dili pito base sa unang nigawas nga balita) ang natala sa Cebu City kini base sa ilang datos.
Niadtong Marso 1 duha ka sunog nahitabo sa Barangay Capitol ug Sunrise Village sa Barangay Poblacion Pardo; pagka Marso 5 laing duha ka sunog na sab ang nahitabo sa Barangay Mabolo ug Ermita ug pag Marso 6 duha gihapon ka sunog ang nitumaw sa Barangay Lahug ug Barangay San Antonio, ang unom pulos residential areas.
Base sa ilang pagbanabana moabot na sobra P14 milyones ang danyos sa maong unom ka sunog matud ni Senior Fire Officer 2 Wendel Villanueva, tigpamaba sa Cebu City Fire Office.
Gihulagway niya nga alarming kini ilabi na nga layo pa ang kataposan sa buwan nga kun itandi sa nangaging mga tuig.
“Actually kung atong tan-awon ang data from 2019 up until last year sa 2019 we have around 70 fire incidents for the month of March unya ang damage ato is P1.8 billion, ang sa 2020 we have 23 P1.4 million ra ang damage unya mao to last year we have 18 P7.4 million that’s for the entire month of March karon duna tay unom P14 million na atong damage,” ni Villanueva pa.
Si Villanueva miasoy nga subsob gihapon ang kampanya sa kabomberohan aron awhagon ang publiko nga magpakabana ug magbinantayon kanunay aron malikayan ang sunog. Gihimug-atan niya nga ang paglikay nga dunay mahitabong sunog dili lamang matag buwan sa Marso kondili tibuok tuig gyud.
Sa pikas bahin, gimandoan ni Cebu City Mayor Michael Rama ang Department of Social Welfare and Services (DSWS) nga papaspasan ang paghatag sa financial assistance alang sa mga nasunogan.
Ang matag pamilya nga homeowners makadawat og P20,000 samtang ang renters ug sharers tag P10, 000. Kuhaon ang maong pundo gikan sa disaster funds sa siyudad.
Sa laing bahin, dili mominos sa P5 milyones ang danyos sa sunog nga niulbo sa Anda Public Market diha Barangay Poblacion sa lungsod sa Anda sa Bohol niadtong Domingo sa kaadlawon.
Matud pa ni Senior Fire Officer 2 John John Joy Remedio sa Anda Fire Station gisusi nila karon ang posibilidad nga electrical overload ang hinungdan niini. —Rowena Capistrano/IBM (BANATNEWS)
- Latest
