Luwas ba ang mga batang way bakuna sa mall?

CEBU, Philippines — Tungod sa peligrong matakdan og coronavirus ang mga kabataang wala pa mabakunahi, giawhag ni Pres. Rodrigo Duterte ang mga local government units pagpanday og ordinansang magdili kanila sa mga malls ug mga publikong lugar.

Kini sukwahi sa kasamtangang gipatuman na karon sa mga lugar nga ubos na sa Alert Level 2 status nga nagtugot na sa tanang mga bata nga makagawas sa ilang panimalay ug makasulod sa mga malls ug pangpublikong mga lugar basta kuyog ang bakunadong mga ginikanan o guardians.

Mao sab kini ang naobserbahan sa Cebu City Police Office (CCPO) mao nga buot nilang irekomendar sa Emergency Operations Center (EOC) ang pagdili sa mga batang nag-edad og 11 anyos paubos kay nabantayan nga daghan na karon ang makita sa mga malls sa nanglabay nga mga adlaw.

“Usa man nis gitan-aw karon sa EOC nga unsay mga directive nga pwede buhaton,kaning mga infant nga di man gyud ni sila pwede sul-oban og mask,nya kaning mga toddler tangtangon ang mga mask,”matud pang Police Lt. Colonel Wilbert Parilla sa CCPO.

Gitun-an nila karon kun mapasakaan ba nila og kaso ang mga ginikanan kun moinsister silang dad-on ang mga anak nga di bakunado sa mga malls.

Sa pamahayag ni Duterte sa iyang Talk to the People Address nga gipasalida niadtong adlaw nga Lunes, dili unta pasudlon ang mga batang ubos sa 12-anyos ug kadtong mga wala mabakunahi batok sa Covid-19 sa mga malls ug publikong mga lugar tungod kay peligro kaayong matakdan sila.

“I am calling all local government units to consider passing ordinances for age restriction among minors who can be allowed to go to the malls,” sumala pang Duterte.

“Alam kong gustung-gusto niyo nang ipasyal ang mga anak niyo after staying for so long inside your home due to lockdowns, pero isipin ninyo kung maliliit pa ang mga anak niyo at hindi pa bakunado, do not expose them to the virus. They have no defense mechanism in their system (against) Covid-19,” dugang pa niya dugang sa pagingon nga nagpabiling hulga sa panglawas ang Covid-19 ug mabuntog lang kini kun sundon ang minimum health protocols ug paspasan ang pagpamakuna.

Apan si acting presidential spokesman Karlo Nograles mipasabot sa pamahayag sa pangulo nga ang mga LGUs na maoy modesisyon kun unsay angay tungod kay sila maoy nasayod sa sitwasyon sa ilang lugar.

“We have to balance the economy and health protocols and we need to do it so the recovery of our economy will continue while keeping the citizenry healthy,” matud pang Nograles sa press briefing sa report sa Philstar.com.

“So the appeal of President Duterte is for LGUs (local government units) to consider passing ordinances. So it will depend on the place, the situation, and circumstances in their area. They have to determine what is good for their local jurisdictions based on science and the advice of the health experts whether in the national or in the local (level),” dugang pa niya.—IBM (BANATNEWS)