P25.5 milyones ang medical supplies nga napalit ug gi-order sa Probinsiya
CEBU, Philippines — Nikabat ngadto sa P25.5 milyones ang kantidad sa gi-order ug napalit na nga medical supplies ug emergency medicines sa Probinsiya sa Sugbo alang sa mga pasyente sa COVI-19 nga anaa sa provincial ug district hospitals lakip na sa isolation facilities.
Sa maong kantidad, P2.1 milyones niini ang gipalit alang sa emergency medicines sama sa remdesevir, dexamethasone, tocilizumab ug azithromycin, P12.8 milyones ang kantidad sa high flow nasal cannula, rental sa ventilators ug consumables sa high flow cannula machine.
Sa upat ka provincial hospitals, P1.59 milyon ang kantidad sa deposit sa cylinder (200) ug 40L nga oxygen tanks (200) samtang P2.9 milyones usab sa 12 ka district hospitals nga gihatagan sa Kapitolyo og 200 ka deposit alang sa cylinder, 200 ka 40L nga oxygen tanks ug 200 ka oxygen regulator.
Nipalit usab ang Kapitolyo og COVID-19 rapid antigen test device, hygiene kit ug pulse oximeter nga nikantidad tanan sa P4.3 milyones.
Sa isolation facilities, tag 250 ka deposit sa cylinder, 40L oxygen tanks ug oxygen regulator ang gihatag sa Kapitolyo nga nikantidad tanan og P2.6 milyones.
Abante barangay
Samtang adunay mga pribadong sektor usab ang nitabang sa mga hospital sa probinsiya pakigbatok sa COVID-19 sama a Abante Barangay nga usa ka community-based organization.
Ang Abante Barangay ni-turn over kini og 30 ka medical oxygen tanks ug regulators ngadto sa Probinsiya sa Sugbo diin ang maong oxygen tanks gidonar sa Cebu Link Joint Venture.
Si Atty. Aristotle "Totol" Batuhan, chairman sa Abante Barangay nihatag usab og P100,000 sa pagpalit sa maong regulators.
Si Dr. Christina Giango, hepe sa Provincial Health office nagkanayon nga ang maong oxygen tanks iapod-apod ngadto sa district hospitals diha sa mga lungsod sa Argao, Badian, Barili, Bantayan, Camotes, Daanbantayan, Minglanilla, Malabuyoc, Oslob, Pinamungahan, Sogod, ug Tuburan.
Nihatag usab ang Abante Barangay og tulo ka oxygen tanks ug regulators ngadto sa Eversley Childs Sanitarium and General Hospital niadtong Agosto 17, 2021. —BDB (BANATNEWS)
- Latest
