Balay ni Konsehal Cuenco gisud og kawatan

CEBU, Philippines — Gisulod og armadong kawatan nga nagtaptap sa nawong ang panimalay ni Cebu City Councilor James Anthony Cuenco diha sa dalan M. Velez, Barangay Guadalupe, siyudad sa Sugbo mag-alas 12 sa tungang gabie niadtong Miyerkules.

Matod ni Konsehal Cuenco ala-1 sa kaadlawon nakamata siya gumikan kay init bisan ug nag-andar ang air condition, gipasiga niini ang suga ug iyahang gisusi.

Apan nabantayan sa Konsehal nga ang usa sa mga pultahan sa iyahang kwarto abli nga unta iyaha man kining gisirad-an sa dayon na niyang pagkatulog. Nabantayan sab niini nga ang karsones nga iyang gigamit pagkagabii nawala ug naa didto ang iyahang pitaka.

Nagtuo ang Konsehal nga basin naa sa gawas hinungdan nga natulog kini og balik, apan sa iyang pagmata kagahapon sa buntag nakit-an niya sa sawog sa pikas kwarto ang karsones apan wala na iyahang pitaka.

Tungod sa pagduda  iyang gi-review ang kuha sa iyang CCTV ug didto nasuta nga dunay tawo nga misulod sa ilang panimalay adto kini niagi sa back door.

Ang kawatan nideretso sa opisina ni Cuenco nga konektado ra sab sa iyang kwarto.

Makita sa CCTV nga samtang natulog si Cuenco sa iyahang kama ang kawatan nagsige sab og pangita sa unsay pwede makuha hantod nga nakit-an ang karsones nga maoy gisudlan sa iyang pitaka.

“May nalang gani wala ko kamata, then finally nakit-an niya akong karsones gidala gibilin didto sa pikas nga room so mao to ang panghitabo and then this morning when we all knew about it we said we look around I told my helpers they found my wallet over there at the back gilabay, my cards, my IDs were there except the cash. It’s not about the kuan ang ako lang I’m really thankful nga wala ko kamata kay if I did, if I resisted mapusilan nuon ta,” sigon ni Cuenco.

Nagduda siya nga nasuhito sa iyang panimalay ang kawatan tungod kay nahibawo man kun asa mosulod ug moagi.

Ang hepe sa Police Station 9 Police Major Jonathan dela Cerna miasoy sa pag-review nila sa CCTV makita nga pagpangawat ra gyuy tuyo sa kawatan.

Wala nila gisalikway nga suhito ang kawatan sa balay sa konsehal.

“Actually ang atong mobile patrol naa diha sa kilid nag-blinker pa gyud na kay akong gi-direct atong mobile patrol mosuroy gyud nianang mga during na after sa curfew hours unya anha ang stand-by area niya. Ako na i-realign for now ako na ibutang diha dapita, atubangan,” asoy ni Police Major Dela Cerna. —IBM (BANATNEWS)